BUH SENG RAWH KHAI

MATHAIA 9:37-38
A zirtîrte hnênah chuan, “Buh seng tûr a tam tehlul nên, thawktu lah an tlêm si; chutichuan, a buh seng tûra mi tîr tûrin buh neitupa dîl rawh u,” a ti a.

Anglican rawngbâwltu Chad Varah chuan kum 1953 daih tawh khân mitthi a vui a. A mitthi vui chu hmeichhe kum 18 mi niin mahni intihlum a ni a. Mahni intihhlum chungchâng zirtute chuan chu hmeichhia chuan harsatna nasa tak a tâwk a ni tih an hmuchhuak a, chuvanga intihlum a ni, an ti a ni.

Chad-a chuan chu a harsatna chu hriatsak se chuan a puih theih ngei a inring tlat a. Chu hmeichhe thihna chuan nasa takin a nun a sawinghîng a, a haw hnu chuan Pathian hnênah a ṭawngṭai a, harsatna tam tak neite ṭanpui tûrin kawng hawnsak tûrin a dîl a ni.

Chad Varah ṭawngṭaina chu Pathianin a ngaihthlâksak a, remchâng a siamsak ta a. London khawpui-a an Kohhran aṭang chuan hna a ṭan ta a. Harsatna nei apiang tân chawlhkar-tin an Kohhran Telephone-ah amah biak theihna hun a hawng ta a. Chutianga harsatna nei an awm chuan a biak theih thu chanchinbu-ah te a chhuah ta bawk a. A vawi khatna-ah chuan a rin phâk bâkin rawn phone an tam êm êm a, mi 29 laiin an harsatna an rawn thlen a ni.

Hmalâkna zau zâwk a ngai tih hriain mi dang a sâwm belh a, ni tin darkâr 12 chhûng chutiang harsatna thlen hun chu an hawng ta a. Tichuan, ram hrang hrang-ah ‘Samaritans’ pâwl a lo din phah ta hial a, nunna tam tak an chhân phah ta bawk a ni.

Midangte tâna nunna chhanhimtu ‘Samaritans’ kan ni ve thei. Tisa chhanhimtu mai nilovin thlarau bo chhanchhuahna tûra hmanrua ni tûr thlengin Pathianin min ko a ni. Chutiang rilru chu pu ve ila, kan phâk ang tâwkin i thawk ṭheuh ang u.

1 PETERA 3:9
Sual sualin thungrûl suh ula, ânchhia pawh ânchhiaa thungrûl lovin, malsâwm hlauh zâwk rawh u; malsâwmna dawng tûrin asin Pathianin a koh che u.