ENTAWN TLÂK

1 KORINTH 11:1
Keiin Krista ka entawn ang hian nangni pawhin mi entawn ve rawh u.

Nu pakhat hian a fanu hruaiin Gandhi-a bulah an rawn kal a. A harsatna chu a fanu chuan sweet thlum a heh êm avangin chaw a ei mumal peih lo a, a hriselnain a tawrh phah vâng mai mai a ni a.

Chu nu chuan Gandhi-a hnênah chuan a fanu in a thil chîn ṭha lo chu a sim theihna tûrin zilhhau tûrin a ti a. Gandhi chu a ngawi reng a, thil tam sawi lovin chu nu hnênah chuan, “Chawlhkâr thum hnu-ah i fanu hi rawn hruai leh ang che, tichuan ka lo zilh dawn nia,” a ti a. Chu mite nufa chu an haw leh ta rih phawt a ni.

Kâr 3 hnu chuan an rawn kîr leh a. Gandhi chuan hmeichhe naupang chu a hruai hrang ta a, sweet ei ṭhat lohna leh a pawi theih dân te hrilhin ei tawh lo tûrin a ti a.

Chu nu chuan Gandhi-a hnênah chuan lawmthu a sawi pah chuan, “Ka hriat duh chu, Gandhiji, engati nge he thu hi kâr 3 liamtaa kan rawn kal khân i hrilh mai loh le?” a ti a.

Gandhi-a chuan, “Ni e, a dik khawp mai. Mahse keipawhin kâr 3 liamta khân Sweet thlum hmuam hi ka chîn ṭhan, ka sim theih loh a ni a, tunah chuan ka sim tawh e,” tiin a chhâng.

Fate an ni emaw ni lo emaw, school-ah emaw Sunday school-ah emaw, pâwl-ah emaw eng thil-ah pawh midangte zirtîr tûr hian zirtîrtu hi a tling tûr a ni a, fihlimna tûrah fihlimin a zirtîrna chu a hlawhtlin theih ngeina tûrin amah a inenfiah a pawimawh hle.

Kan tling lo kan ti fo, a dik e. Chu erawh chhuanlam lian berah kan hmang tûr a ni hauh lo. Fate, zirlaite, member-te entawn leh zir tlâk ni tûrin theihtawp kan chhuah a pawimawh a, a bâk tlin lohna chu Pathianin a ropuina tûrin a hnawhkhat tawh ang.