CHHUANLAM SIAM
LUKA 14:18-19
An za chuan inthurual ang maiin an lo pha ṭheuh va. A hmasa ber chuan, ‘Lo ka lei a, a enin ka kal a ṭûl a ni; khawngaih takin mi han phatsak ang che,’ a ti a.
Dublin, Ireland rama chêng Rev. Sidney Laing chuan chhuanlam siam reng kohhran-mi, inkhâwm thatchhe lutukho chu tihngaihna a hre lo a. A tâwp a tâwpah chuan an kohhran bulletin-ah hetiang hian a ziak:
“Ka intihfai fo lohna chhan sâwm (10)”
1. Nausen anga bual ka la ngaih avângin.
2. Intifaite chu mi verther, ṭha si lo ṭha anga lan tum an ni a. Midangte aia faia inngaite an ni.
3. Sahbawn chi hrang hrang a awm a. Hman tûr ṭha ber ka hriat loh avângin.
4. Easter leh Krismas vêlah chuan ka la intifai peih tho mai.
5. Ka ṭhian ṭhenkhatte pawh an intihfai ngai loh avângin.
6. Ka la ṭhalai êm êm a. Ka upat huna ka balh deuh hunah ka la intifai ang.
7. Intihfai nân hun ka nei lo êm atin ni.
8. Bathroom hi a nuam lo a, a vâwt theih êm avângin.
9. Ka intifai ve zeuh zeuh ṭhin a, mahse a ninawm êm avângin ka peih ta lo a ni.
10. Sahbawn siamtute rêng rêng pawh hi an sum duh vâng maia siam an ni.
Kohhran member zât thlîrin inkhâwm zât induhkhawp lohna lian ṭhin hle mah se Pathian khawngaihna changin ram dang ngaihtuah chuan Mizoramah inkhâwm hun/zân kan neih tam ang aiin kan la ṭha êm êm a, a lawmawm hle.
Chhuanlam siam leh peih loh avânga inkhâwm loh leh Kohhran programme ngaih pawimawh loh erawh Pathian pawi sawina a ni a. Kohhranah a kûl a taiin inhmang lo mah ila, a kûl a taia Kohhran kut ke kan ni. Chuvangin ringtu tân chuan Kohhran nghen tlat hi himna kulh pawimawh tak a ni.
