SUALIN THIHNA A HRING

JAKOBA 1:15
Chu châkna chuan no a pai a, sual a hring a, a lo puitlin chuan thihna a hring ṭhîn.

Mahni hamṭhatna leh hmasialna avângin sual tih hreh lohna lian tak, mi bum duhna te, eirûk duh mai nate kan nei ṭhin a. Chûng hunah chuan kristian tam takte hian chunglam duh dan kan thlîr duh lo a, lei lamah kan rilru kan nghat lui tlat ṭhin a, chu châkna sual, he khawvêl thinlungin a put kan hneh theih loh chuan thil sual min khawih tîr ṭhin a ni. Chu sual chu a lo puitlinin thihna a hring ṭhin tih Bible-in min hrilh a ni.

Sumdâwng hausa tak mai hi natna khumah muin a thi tawh ngei dâwn a ni tih a inhria a. A thih dâwn tâkah chuan a thawhpuipa hnênah ngaihdam dîlna tûr a neih avângin a koh tîr a.

Tom-a hnênah chuan, “Tom-a hei ka thihsan ta mai dâwn che si a, i hnênah ngaihdam dîl tûr ka nei a, khawngaiha min ngaihdam theih chuan ka lâwm hlê ang,” a ti a.

Tom-a chuan, “Ni e, chutiang te a awm anih chuan han sawi ta che,” a ti a.

Sumdâwng hausa pa chuan, “Hmanni-ah America Firm pakhat hnênah kan ram lian tak kha ka hralh a, Dollar 20,000 lai maiin ka bum che a, chuvangin khawngaih taka min ngaidam tûrin ka ngên a che,” a ti a.

Tom-a chuan, “A ni maw, kei pawhin ngaihdam dîlna tûr che ka nei asin. I coffee no-a tûr phultu kha keimah ka ni a,” a ti ta mai a. Sumdâwng hausa pa chuan a thil tih dik loh chu a tuar ta a ni.

Rei lote atâna sual nawmna chen ai chuan Isua hming avânga chân ngam lo chuan a chân ta zâwk a ni.

JAKOBA 4:17
Chutichuan, thil ṭha tih tûr hriaa ti si lo chu a sual a ni.