LALPAN MIN TÎR

JOHANA 20:21
Tin, Isuan an hnênah, “In chungah thlamuanna awm rawh se; Pain kei mi tîr ang bawkin ka tirh che u hi,” a ti leh a.

North Carolina bula tuipui kam vêlah chuan mi tam tak an awm ṭhin a, nasa takin thli a thâwt ṭhin avangin tuipui a fâwn nasa thei êm êm a, chu chuan lawnga chuangte leh tuia infiammi tam takte chu a rawn nuai ṭhin a, chhanchhuah ngaiin mi tam tak an awm ṭhin a ni.

Hemi anih avâng hian Life Saving Station a awm a, heta hnathawkte chu Life Saving Service an inti leh a, chûng mite chuan lawng pil mêka mihring chuangte leh tuipui fâwn ina mihring a len bote chu chhanchhuak tûrin mahni nun thâpin an pênchhuak a, dârkâr tam tak chaw ei lo leh mu lovin chhanchhuahna hna an thawk ṭhin a, thih leh dam inkârah awmin thlipui leh ruahpui nasa tak kârah nunna chhanchhuah anih theih dawn phawt chuan vâwt chu engahmah an ngai lo, an bei fat fat ṭhin.

Mi tam tak an chhanchhuak a, chhanchhuah theih loh pawh an nei fo mai. An motto pawh, ‘Kal chhuak la, rawn lêt kher a ngai tawh lo’ tih a ni.

Kan rawngbâwlna ṭheuh hi Life Saving Station anga pawimawhna nêp chuang lo, vawiina ṭhalai nuai têl teh meuh boralna thlipui leh ruahpui ina a len mêk chhanchhuak tûra hnathawhna a ni.

Mizoram-a Kohhran hrang hrang leh pâwl ṭhenkhatte chuan thlaraubo chhanchhuak tûrin Missionary tam tak an tîrchhuak a, chûng mite chuan chanchinṭha la hre ngai lote hnênah chhandamna thu an hril mêk a ni.

Station chhuahsan lovin thlaraubo chhanchhuah hi a har hlê ang. Chhanchhuah ngai, tisa leh thlarau-a chau ngawih ngawihten min rawn pan thei kher lo ang, keinin kan pan loh chuan boralna tuipuiah an pil mai dawn a, kan penchhuah thuai a ṭul a ni, chutah chuan nun thâpin kirtawh lo ila!

Luka 10:3
Kal rawh u; ngai teh u, chinghne zînga berâmno awm angin ka tirh che u hi.