INTODELH I TUM ANG U

1 THESSALONIKA 4:11-12
Kan hrilh ang ngei che u khân, phîli ruai lovin, mahni hna ṭheuh vuan tlatin, mahni kut ngeiin hna thawk rawh u; tichuan, mite ngaihsân in hlawh ang a, eng mah in tlachham lo vang.

Pathian zawn chhuah ram kan intih mêk laia Punjab buhfai lova khawsa thei lo ram kan ni reng mai te leh ram dang power tel lova awm hlei thei lo kan la ni hi chu Zoram mipuite kan inenfiah a ṭûl hle mai. Tlang taka sawi chuan politics rilru kal sual leh mahni pumpui ṭanghma ngaihna vâng a ni tih a chiang.

Eng pawh ni se, Mizoram pum pui vei vak ai maha pawimawh chu mahni chhûngkua intodelh tûra hmalâk nachâng hriat hi a ni a. Chhûng tinte kan intodelh chuan Mizoram chu a intodelh a ni mai dâwn a ni. Kan intodelh lohna kan vei vânga ram hruaitute dem vak aiin mahni chhûngkua kan intodelh lohna hi vei ila, a sâwt zâwk mah ang. Paula sawi ang hian chhûngkaw member tinte hi hna ṭangkai thawka inhmang reng tûrin infuih ila, i awm mai mai lo vang u.