NGAIHDAMNA

1 JOHANA 1:9
Kan sualte kan puan erawh chuan, ani chu a rinawmin a dik si a, kan sualte min ngaidamin kan dik lohna zawng zawng min tlen faisak dâwn a ni.

Kan hun kal tawha kan thil tih sual emaw kan tih dik lohte hian kan hringnun a tichhe thei hle mai a. Mahse bul kan ṭan thar a, theihtâwpa nun kawng dik kan zawh leh anih chuan hun liam tawhte chu rei loteah theihnghilh a ni ṭhin.

Pathian pawhin kan tihsualte hre reng lovin a khawngaihna leh hmangaihna avânga min ngaihdamna chuan hun lo kal tûr atân beiseina êng min hmuhtîr a. Hun ṭha zâwk ni mai lovin nun ṭha leh duhawm zâwk, chatuan thlengin min ruatsak a ni.

Joel Osteen-a chuan a thusawina-ah tihian a sawi, “Tlâi khat chu ka fapa, Jonathana hian ‘Ka pa min ṭanpui rawh’ tiin min rawn au chiam mai a. Tukverh-a ka han hawi chhuak chu thingkung zârah a lo tâng a, a tla ṭêp hi a lo ni a. Ka fapa in ‘Ka pa min ṭanpui rawh’ tia a pa min auh khân, kei chuan, ‘Ngawi teh, thu i awih leh awih loh ka han enfiah lawk ang e’ ti ila, a room a felfai leh felfai loh te, a lehkha zir tûr a thiam leh thiam loh te, a progress report card te ensak phawt ila, mak in ti ngei ang. A chhan chu ka fapa duatlai chu chhanchhuah a ngai a, chutih a hnekin ṭanpui tûrin min ko si a. A hun kal tawha a nungchang chu eng pawh ni se Pa hmangaihna aṭang chuan a fapa mangang authâwm chu a chhâng lo ang em ni?” tiin.

Hetiang chiah hi a ni. Kan Pathian, kan Pa vana mi chuan keini a fate hi min hmangaiha, a hmangaihna chu mihringin a fate tâna a hmangaihna aiin a nasa zâwk a ni. Chuvangin tisual tawh mah ila, a hnêna ngaihdam kan dîl chuan nun thar min pe dâwn a ni.

ROM 4:7
An bawhchhiatnate ngaihdamsaka awma, an sualte thai bova awmte chu an va nihlawh êm!