ISUA HMEL HMU

ISUA HMEL HMU

1 JOHANA 3:2
Duh takte u, tûnah hian Pathian fate kan ni tawh reng a, engtin nge kan la awm dâwn tih erawh chu a lang rih lo va. Amah a lo lan hun chuan amah ang kan la ni ang tih zawng kan hria, a nih ang takin amah chu kan la hmu dâwn si a.

Khawvel Evangelist te zînga hriathlawh êm êm, D.L. Moody-a chu a khumah thi mai tûrin a awm tawh a. A ṭhianṭhate leh a rawngbâwlpui ṭhin te an rawn lêng a. A khum bulah chuan an inkâwm hlawm a. Chutih lai tak chuan a mitmeng chu êngmawi êm êm mai hian a rawn meng a. A bula awmte chuan ropui an ti a, mak an ti a. Tu emaw chuan ṭawngṭai a rawt a, ṭawngṭai a tum ta a, chutihlai tak chuan D.L. Moody-a chuan, “Ka damna tûrin ṭawngṭai lo la, Dwight leh Irene-te (a hma lawka a tute pahnih boralta te) ka hmu a, Isua hmêl mawi tak ka hmu bawk a ni. Ka hlim êm êm a, khawvêl chu ka lakah a kiam tial tial a, vân kawngkhâr a inhawng mêk a ni. Pathianin min ko a, vawiin hi Lallukhum ka khum ni (Coronation Day) tûr a ni,” a ti a ni.

Johana chuan, “Chûng hnuah chuan mipui nasa tak tu ma chhiar sên loh, Jentail-te leh hnam tin, mi tin, ṭawng tina mi ka hmu a, tûmkaute kenga kawrfual vâr ha-in lalṭhutthlêng leh Berâmno hmaah chuan an ding a.” a ti a ni (Thupuan 7:9).

Sam 17:15-ah chuan Lal Davida chuan, “Kei zawng mi dik ka nih vângin I hmêl ka hmu ang a, Nangmah anna neia ka ṭhanharh hunah chuan, Ka lungawi takzet ang.” a ti a ni.

Khawvêl hrehawm tak hi chhuahsana Lalpa hmel hmuh hlân a nghahhlelhawm takzet. Mahse thlarau bo chhanchhuak tûrin hna a la tam êm êm a, chu rawngbâwlna hna thawk tûr chuan Pathianin min ko a, chu rawngbâwlna kan hlen hunah chuan D.L. Moody angin Isua hmêl kan la hmu dawn a ni.

MATHAIA 5:8
Thinlunga thianghlimte chu an chan a ṭha e, Pathian an la hmu dâwn si a.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy