ISUA HNÊNAH CHAUH

ISUA HNÊNAH CHAUH

ISAIA 57:18
An awm dân chu ka hre reng a, Mahse, an natna chu ka tihdamsak ang a, Ka hruai ang a, ka pui ang a, Lusûnte chu ka thlamuan ang.

Lal Isua hnênah chauh lo chuan khawiah mah thlamuanna te, lâwmna te kan hmu lo ang. Hla phuahtu pawhin, “Lal Isua hnênah, Lal Isua hnênah ka thlen ngei ang ka phurrit zawng chu, ka tân a rit lua he ka sual phur hi, Isua chauh min pui theitu a ni,” a tih kha.

Sava pakhat chanchin hetiang hian an sawi. Sava mantu mi pakhat hi a awm a, sava chi hrang hrang a zawng ṭhin a. Ramhnuai pilril tak tak ah te kal ṭhinin a sava man te chu sahuana dah tûrin a hralh ṭhin a. Vawi khat chu sava mawi leh danglam êm êm mai hi a man hlauh mai a, a dahna tûr bâwm pawh uluk lehzualin a siam a. Tichuan hralh tûrin US lamah lawngin a kal ta a.

Chu sava mawi leh danglam tak chu a bâwm aṭangin engtin emaw a tâl chhuak ta daih mai a. ‘Ka zalen ta e, ka zalen ta e,’ ti niawm tak hian lawng chung vêlah chuan a thlâwk kual chiam a, lawng puan zârna vêlah te chuan thlamuang takin a fu a, tichuan bâwm chhûnga awm leh tawh ngai lo tûrin lawng aṭang chuan tuipui zâu tak chungah chuan a thlâwk chhuak ta a ni.

Sava mantupa khan a chhuah lohna tûrin a bâwmah a ei duh zâwng tûr ṭha leh tui tak tak a pe a, mahse a chhuak ta si a, a ui êm êm a ni. Khaw thim dâwn thleng chuan chu sava mawi thlawh bona lam chu a thlîr reng a, chutih lai tak chuan vân boruak aṭang chuan eng emaw rawn hnai telh telh hi a hmu a, mak tak maiin chu sava mawi tak chu a rawn thlâwk lêt leh hi a lo ni a. A mantu chuan a bâwmah ei tûr a dahsak a, a kawngkhâr a hawng a, chuveleh sava chu a rawn thlâwk lût leh ta a ni.

Chu sava chuan tuipui al chung zâu takah ei tûr a hmu lo a, chawlh hahdamna a hmuh loh avângin a rawn thlâwk lêt leh a ni.

He damlai tuipui chungah hian Lal Isua hnênah chauh lo chuan khawiah mah chawlhna nuam leh hahdam a awm lo tih kan hriat nawn a pawimawh hlê. A hnên ata thlâwk bo mah ila, a hnênah lo chuan chawlh hahdamna a awm lo a ni.

avatar
1 Comment threads
0 Thread replies
0 Followers
 
Most reacted comment
Hottest comment thread
1 Comment authors
Sangtei Recent comment authors
  Subscribe  
newest oldest most voted
Notify of
Sangtei
Guest
Sangtei

ka nun in a mamawh leh ka hriat ngai ngawih² te min chhawp chhuah sak thin a vang in ka va lawm em in rawngbawlna Lalpan malsawm zel che u rawh se

Copyright © 2017-2019 Our Daily Bread Mizo.
Privacy Policy