RINNA NUNG

ROM 5:1
Chuvângin, rinna avânga thiam changa awmin, kan Lalpa Isua Krista avângin Pathian nên inremin i awm ang u.

Vân sâng taka thlawhtheihna aṭanga zuan thlâk hi infiamna hmuhnawm tak a ni a. Ṭhenkhat tân erawh a hlauhawm thei viau awm e. Vawi tam tak zuang thla tawhte tân chuan Parachute tih puar hun te, boruaka thli awm dân a zira han tih kual vêl dân te an thiam vek tawh ang a, a hlauhawmna pawh an hre tawh lo hial mai thei a ni.

Vawi khat zuan thlâknaah chuan tumah huaisen taka ti an awm kher lo mai thei. Thiam tawh takten a hlauhawm lohna te, parachute phelh hun te, taksa rih zâwng hman dân te chu sawi mah se vawi khatna ti tân chuan ngaihngam taka tih a harsa ang tih chu a hriat reng a ni.

Kan zuanthlâk ve duh chuan Parachute a rintlâkzia hrechiang tawh tuten an sawi kan zâwm a, kan rin ve a, kan hman thiam chuan la tingailote hnênah kan hrilh hun a la thleng ve dâwn a ni.

Rinna kawng pawh hetiang deuh hian sawi zawm ta ila. A mite hnêna a thutiama dingnghet kan Pathian hi kan tân a rinawm êm êm a, kan rin ngam takzet a pawimawh a ni. Kan tûnlai khawvêl nun dân thlîrin Lal Isua’n nunna Lallukhum min pêk a tiam hi a tak tak a nih kan rin loh avângin a tâwp thlengin rinawmin kan awm duh ta lo a, khawvêl nawmna kan tem theih zawng zawng chu tem vek kan tum ta a ang hle.

I ring ang u khai! Beiseina nung kan rinna anih chuan kan nunin a thupêk zawmna kawng a zawh ngei ngei ang. Chu thiltih chuan thil tih tel lova rinna thi chu a tinung a ni.

1 JOHANA 5:4
Pathian hrin tawh phawt chuan khawvêl hi a ngam ṭhîn: hei hi a ni, khawvêl hneha ngamna chu, kan rinna hi.