MI TÎR TA CHE LALPA

ISAIA 6:9
Ka hnênah chuan, “Kal ta la, he hnam hi va hrilh rawh: Ngaithla reng mah ula, a ngaihna in hre lo vang, En reng mah ula, in hmu si lo vang,” tiin.

Detroit khawpui, USA-ah chuan sumdawng hausa tak mai Ralph Freed-a hi a awm a. Burroughs Corp. dinin hmun hrang hrangah sumdawnna hlawhtling tak a nei a. Chutia a sumdawnna a parvul vânglai tak chuan a piangthar a, kum 25 mi chauh a ni nghe nghe a. A pianthar hnu chuan a sumdawnna hmun hrang hrangah Pathian hmangaihna thu a sawi nasa ṭhin hle.

Ni khat chu a ṭhianṭha tak mai hian rawn lênchilhin an inkâwm a, Pathian thu a sawi mawlh mawlh lai chuan a ṭhianpa chuan, “Ralph, i thusawi zawng zawng aṭang khan chhandamna a awm thu te, tu pawh Krista ringtu chu vânramah an kal ang i tihte kha i ring ngam tak tak maw?” a ti a. Ralph-a chuan, “Tehreng mai, Pathian chuan min chhandama, kan tân vânram a buatsaih chang tûrin rinawm takin a hnung kan zui tûr a ni,” a ti a.

A ṭhian chuan, “Ralph, Africa leh Asia rama mi tam takte chuan he thu hi an hre lo a, chuvangin ni tin zan tinin an boral chur chur tih i hria em. I hriat reng si a, heta i sumdawnna hmuna ṭhutna nuam taka i ṭhut der der a, i hlawh tam tak pawisa i chhiar mai mai chuan i piangthar tak tak lo a, i ṭha der mai mai a ni lo maw?” a ti a. Chu chuan Ralph-a thinlung a khawih a, a inngaihtuah chhuak a, Pathian hnênah a ṭawngṭai a, “Lalpa, i duhna-ah chuan mi tîr ta che,” a ti a. A hna uiawm tak chu a chawlhsan a, a che chhuak ta a ni.

Syria ramah kum 20 chuang rawngbâwlin a kal a, Transjordan-ah pawh hun rei tak a awm a, chutah chuan Radio Network a bun a, a hmingah Trans World Radio tih a ni a, vawiin thlengin kan hre ta a ni.

MATHAIA 7:21
‘Lalpa, Lalpa,’ mi ti nazawng chu vânramah an lût lo vang a, ka Pa vâna mi duhzâwng titute erawh chu an lût ang.