MALSAWMNA DAWNG

1 JOHANA 3:16
Anin kan tân a nun a pêkah hian hmangaihna chu kan hre ta. Keini pawhin unaute tân kan nun kan pe ve tûr a ni.

Midangte tana malsawmna nih hi malsawm dawnna dawhthlêng ṭha tak a ni tih hi mi pakhat nun aṭang hian a lang chiang êm êm a. Pathian malsawmna dawng tûr hian kan chêt chhuah a ngaihzia pawh he nun aṭang hian i han zir teh ang.

Mi pakhat hian kawng sîra Mercedes Car nghênga nu pakhat lo ding reng hi a hmu a. A car ke chu a lo thêp vek mai a. Hmeichhe tân chuan han thlâk rual a ni lo. Chupa chuan a ṭanpui ta a, a ke a thlâk chhûngin a car chhûngah lo ṭhu hahdam turin a hrilh a, rei lote hnuah chuan a thlâk zo ta a. Chu nu chuan lawmthu sawi nan pawisa pêk a tum a, mahse ani chuan midangte ṭanpui theia a awm chu a lâwmzawng a nih thu leh ani pawhin midangte ṭanpui tûr a hmuh chuan a tih anga ti ve tûrin a hrilh ta zâwk a, an inkalsan ta a.

Hla vak lo a tlân hnu chuan Restaurant-ah a châwl a, chuta lo dawngsawngtu chuan nau a pai tih a hria a, fel a tiin chu restaurant-a chawlh hahdam chu nuam a ti hle a, a ei in zawh chuan lawmthu sawinân Dollar 100 a pe a, a chhuah dâwnah a napkin hnuaiah dollar note a hnutchhiah bawk a, a kalsan ta a.

Raipuar chuan chu nu tih dan chu mak a ti êm êm a, a lawmman atâna Dollar tam tak a hnutchhiah avangin a lâwm hlê a ni. Chumi tlaia a haw a pasal a hmu chu lungngaihna a nei tih a hria a, an naute neih tûrah sum tam tak an mamawh dâwn avangin a lo inngaihtuah nasa hle a ni. A nupui chuan, “Ṭhiana, lungngai suh, Pathian hi a ṭha a ni, vawiinah nu pakhatin lawmman atan pawisa tam tak min pe asin,” a ti a.

A nupui hnêna lawmman atâna pawisa pe tunu chu a pasalin tlaia a ṭanpui, a car ke a siamsak kha a lo ni reng mai a. Pathianin hmangaihna pechhuaktu chu hmangaihna bawkin a thungrul a ni.

KOLOSA 3:14
Chûng zawng zawng chungah chuan hmangaihna inbel ula, chu chu engkim rem taka phuar khâwm theitu a ni.