MI FEL NIHLAWHNA

SAM 37:25
Ka naupan lai ata ka lo tar hnu thleng hian, Lalpan mi dik a thlahthlam tâk ka hre ngai lo, An fate pawh chaw khawn ka hmu hek lo.

Kan Bible-in ‘mi fel’ a tihte hi ‘Pathian ṭih mite’ hi an ni tlangpui ṭhin. Lal Davida hian he Sam 37-na hi a tar lamah a phuah a. Ama nun leh a mi hriat chiante nun a’n chhût lêt vang vang a, Pathian ṭih mite chu Pathianin a kalsan ngai loh thu leh malsawmna tam taka a vur ṭhin ziate a ngaihtuah chhuak a; an thlahte chen pawha chaw khawn khawpa rethei tumah an awm a hriat loh thu a chham chhuak ta a ni.

Hei hi tûn thleng pawhin a la dik zêl a. Pathian ṭih mite chu an neih lê lu loh pawhin an tlachham ngai lo va. Lalpan a awmpui tlat ṭhin avangin an hlimin an lungawi a. Kawng hrang hrangah an thlen chin aṭangin hma an sâwn zêl ṭhin. Kan ramah pawh hian Lalpa ṭih chhûngkuate hi chhungkaw awhawm leh ding chhuak an la ni zêl dâwn a ni.