NGAIHDAMNA

NGAIHDAMNA 3

KOLOSA 3:13
Indawh tawn ula, mi dang laka thu pawi in neih pawhin inngaidam tawn rawh u, Lalpan a ngaidam che u ang bawk hian ngaidam ve rawh u.

Matthaia 18:21-ah ngaihdamna chungchanga Isua zirtîrna hetiang hian kan hmu a ni; “Chumi lai chuan Petera a lo kal a, “Lalpa, ka unauvin vawi eng zât nge ka chungah thil tisual sela ka ngaihdam ang? Vawi sarih thleng em ni ang?” a ti a. Isuan a hnênah, “Vawi sarih thlengin ka ti lo va che, vawi sarih hmun sawmsarih thlengin ka ti zâwk che a ni.” a ti a.

Pathianin keini pawh min ngaihdam ang hian kan chunga thil tisualtute an awm chuan kan ngaidam ve tûr a ni. Kristian kan nih chuan ngaihdam kan zir reng a ṭul a, phubate phei chu la lo turin min hrilh a ni. Rom 12:19-ah khan, “Duh takte u, phuba la suh ula, Pathian thinurna kian zâwk rawh u. “‘Phuba rêng rêng keima lâk tûr a ni, keiman ka thungrûl ang,’ Lalpan a ti,” tih ziak a ni si a.” tih kan hmu a ni.

Tin, tute emaw chuan khawtlang tâna mawi lo leh duhawm lo an lo tipalh thei a, sualna lian tak, Pathian ngaihah leh khawvêl dân pawh ina na taka a hrem theih te pawh a ni ang. Chûngah te pawh chuan sualin thungrulh ve mai tûr a ni lo. Pathian thû vêkin ti hian min hrilh, “Sual chu sual vêkin thungrûl lo ula, mi zawng zawng ngaiha mawi ngaihtuah zâwk rawh u.” tiin. (ROM 12:17)

Corrie Ten Boom-i kha ngaidamtu ropui a ni, Hitler-a leh a hoten a chhûngte, a laizawn ngei pawh an thahsak a, a thattu pawh a hria. Mahse amah an chawimawina ni-ah khân chu pa chu rawn kalin, “Corrie, min ngaidam thei ang em?” a rawn ti a. A duh dân chu ni se Corrie Ten Boom chuan a ngaidam lo ang, mahse ngaihdam chu a tih tûr a ni tih a hria a, chibai pahin “Ka ngaidam a che,” a ti a nih kha. A ropuiin a entawntlâk takzet a ni. Ngaihdam vena hi Pathian hma-a thiam kan chan vena tûr a lo ni.

MATHAIA 6:14
An bawhchhiatnaah mite in ngaihdam chuan, in Pa vâna mi pawhin a ngaidam ve ang che u.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy