FATE HAI LO PATHIAN

FATE HAI LO PATHIAN

1 JOHANA 3:1
Ngai teh u, Pain min lo va hmangaih nasa êm; Pathian fa-ahte min vuah tâk hi! Chutiang chu kan ni rêng e. Hemi avâng hian khawvêlin min hre lo va ni, amah chu an hriat loh avângin.

Lungkertu hian fapa fel tak a nei a. Tlâi khat chu a hnathawhna hmun, lungalhthei khur lâwn chhuahna bulah chuan rawn kalin a pa chu a lo hmuak a.

Mi tam tak an rawn chhuak a, an kal pêl zêl a, an hnathawhna hmunin a zir êm avangin an rawn bâl hlawm êm êm a, an hmâi te chu a dum nuau hlawm a, naupang chuan tute nge an nih a hre thei hauh lo.

Rei tak a pa a nghah hnu chuan a lo la lang thei si lo a, hnathawk ṭhenkhatte chu an haw zêl mai bawk si a. Nakin deuhah chuan mi pakhat hian, “Mama, tu nge i nghah a, eng nge hetah i tih?” a rawn ti a. Naupang chuan, “Ka pa ka nghâk, a la rawn chhuak ve lo a,” a ti a.

Chupa chuan, “A ni maw, mahse engtin nge i pa chu i hriat theih ang? Mi tam tak chu an hnathawhna avangin an hmâi a bâl vek a, tu nge an nih pawh a hriat theih tawh loh a. I pa chuan a kalsan tawh che a ni ang, haw tawh zâwk mai rawh,” a ti a.

Chu naupang chuan, “Ni e ka pu, ka pa hi ka hre thei dawn lo tih chu ka hre reng, mahse a rawn chhuah hunah amah zâwkin min hre dâwn a, ka lam a rawn pan mai ang,” tiin a chhâng a ni.

Hetiang deuh hian kan pa Vâna mi chuan a fate a hre reng ṭhin. Amah hnaih duh lovin tisa khawvêl lamah tlânbo ṭhin mah ila, amah mamawh-a kan beisei hunah min lo hre reng ṭhin a ni. Johana 1:12-ah khân amah ringtute chu fa nihna a pe tih kan hria a. Khawvêl mi mahin a fa a hriat hran theih a, a kaihhruai chuan Pa Pathian chuan a hre reng ang tih rin tûr a ni.

Johana 14:27-ah chuan tihian kan hmu, “Thlamuanna ka hnutchhiah a che u, keima thlamuanna ka pe a che u; khawvêlin a pêk ang ni lovin ka pêk che u hi. In thinlung mangang suh se, hlauh pawh hlau suh se.” tiin.

1 JOHANA 4:11
Duh takte u, Pathianin chuti taka min hmangaih si chuan, keini pawh kan inhmangaih tawn ṭheuh tûr a ni.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy