MIDANG ṬHATNA TÛR

MIDANG ṬHATNA TÛR

1 KORINTH 10:24
Tu pawhin mahni ṭhatna tûr mai zawng lovin mi dang ṭhatna tûr zawng zâwk rawh se.

Pathian thu-ah chuan heti hian kan hmu, “Tu pawh mahni nun humhim tum chuan an chân ang a, tu pawh keimah avânga nun chân chuan an hmu ang.” tiin (MATHAIA 16:25).

Mi tam tak chuan an humhim duh avangin mahni hmâ an sial a, chân an hlauh avangin theihtâwpin an humhim ṭhin. Rawngbâwlna kawnga chânna ni kher lo-ah pawh midangte tân ṭhatna leh malsawmna anih theihna tûra chânna hrim hrim-ah hian Lal Isua a lâwm a, chu chu a duhdân a ni a, chu chânna zâwkah chuan a ni kan humhim dawn ni.

Sai (Elephant) te hi an mak angreng khawp mai a. Tui awmna hmun an thlenin a pa (male) chuan a nu (female) in tui a inzawh hmâ a lo nghâk ṭhin a. A nu-in a in zawh hnu-ah a pa chuan a in ve chauh ṭhin a ni. Dawhtheihna leh duhsakna an entîr a, an entawntlâk hle.

Sakeibaknei-te pawh hian nihphung an nei a. A tlângpuiin a nu (Female Lion) chuan ramsa a pêl a, a man fuhte chu a pa (male) bulah a ei tûrin a rawn pu haw, a pa-in a ei zawh hnu-ah a nu chuan a ei ve chauh ṭhin a ni. Hei hi Sakei-te nihdan phung ni mah se, mahni inphatsanna leh hmasial lohna an entîr hlê bawk.

Zâwngte (Monkey) te pawh hi an lo inhmangaih êm êm a. Hrehawm takin naute an nei ṭhin a, naute an neih dâwn chuan an awmkhâwm a, naute a lo pian chuan an inhlân chhâwng a, hnute an pe liam liam a, a nu dam ṭhat hma an enkawlsak ṭhin a ni.

Hemi kawngah hi chuan Fanghmir-te hi kan sawi bâng thei lo ang. Thil thlum awmna an hriat chuan an inzui dam dam zêl a. An buai hmelin an ti tak thei êm êm a, mahse chuhhelh bîk an awm ngai lo. A hnunglam aṭangin an rawn zuan kân ngai reng reng lo a ni.

FILIPI 2:4
Mahni ṭhatna tûr chauh zawng lovin, mi dang ṭhatna tûr pawh zawng rawh u.

avatar
  Subscribe  
Notify of
Copyright © 2017-2019 Our Daily Bread Mizo.
Privacy Policy