CHAK LOHNAA TIHCHAK

2 KORINTH 12:10
Chuvângin, Krista avângin chak lohnaahte, chhiatnaahte, nêksawrnaahte, tihduhdahnaahte, hnawhchêpnaahte ka lâwm ṭhîn a ni; ka chak loh apiangin a ni ka chak ṭhin ni.

John Stott-a chuan Sydney University-ah thu a sawi dawn a. A ṭawng chhuak thei ta reng reng lo mai a. Zirlaite nên chuan a ṭawng rîk theih nân an ṭawngṭai rual ta ringawt mai a. Chumi zân chuan zan dang zawng aiin thlarau a tla ṭha a. A hnuah vawi 10 vêl a tlawh leh a. A kal apiangin khami zân an hriatreng thu leh, kha mi zâna piangthar an nih thu an lo hrilh ve zêl ṭhin a ni.

Tirhkoh Paula khan taksa chak lohna engemaw tak a kawl ve a. A nin êm avangin vawi 3 ngawt Pathian hnênah tihdam a dîl a, “Ka khawngaihna i tân a tâwk e, ka thiltihtheihna hi chak lohnaah asin tih famkimin a awm ni,” tiin chhânin a awm ta a. Chuta ṭang chuan harsatna chi hrang hrang a tawhnaah pawh a lâwm ṭhin a, a chak loh apiangin a lo chak ṭhin a ni tih chu a testimony a lo ni ta a ni. Tihchak lohva kan awmte hi a chakzia hriat nân hman ve i tum tlat ang u.