TISA LAM THIL DUH

TISA LAM THIL DUH 1

LUKA 21:34-35
Tichuan, nawmsak bâwl te, zu ruih te, ni tin khawsak engtona te in rilrua a khah lutuk loh nân fîmkhur rawh u. Thanga âwk phut ang maiin a rawn nang dah ang che u. Lei pum pui chunga chêngte chungah chutiangin a lo thleng dâwn si a.

Pathian thu mawi tak chu, Matthaia 16:26-a mi kha niin mi tam tak chuan an ngai. Chu chu hei hi a ni, “Miin khawvêl hi a pumin nei sela, a nun chân si se, a tân sâwtna eng nge awm ang? A nih leh, miin a nun aiah eng nge a pêk ang?”.

Khawvel ro hlu, in leh lo ṭha tak tak te, sum leh pai tam takte neiin tisa lam thilah chuan miropui tak ni mah ila thlarau lam thilte kan ngaihsak loh chuan engmah lo mai a ni a, thihna chauh a ni.

Lottery aṭangin sum tak tak dawng thut ila engtin nge kan awm ang le?! Dr. George Samuela chuan a lehkhabu ziah, ‘How can one be happy’ tihah chuan tihian a ziak.

Damlo pakhat hi Care Unit-ah dah a ni a, a natna chu a khirkhan êm avangin a chhûngte leh ṭhiante chuan a thih hun chauh an nghâk tawh a. Chutih lai chuan damdawi in a luh hma-a a Lottery lei aṭangin sum tam tham tak a lo man reng mai a. Mahse a chhungte chuan Dâktawr an rawn a, Dâktawr chuan hrilh rih loh mai nise a ti a. A ṭul leh ṭha a tih angin ama’n lo hriattir tûrin an ti ta a.

Dâktawr chuan damlo chu a fuih a. Rilru paukhauhna nên huaisen taka awm tûrin a hrilh a, chutih lai tak chuan, “Damdawi in i luh hma-a i Lottery lei khan sum tam tak man ta le engtin nge i tih ang?” a ti a. Dâktawrin a fuih mawlh mawlh lai a ni bawk a, damlo chu a phûr êm êm a, “Ka man anih chuan a chanve ka pe ve ang che,” a ti a. Dâktawr chu a phu zawk a, a lâwm lutuk chu a let tawp mai a, lungphu châwlin a thi ta der mai a ni.

Pathian thu chuan, “Tisa lam thil duh chu thihna a ni si a, Thlarau lam thil duh erawh chu nunna leh thlamuanna a ni.” tiin min hrilh (Rom 8:6).

GALATIA 6:8
Mahni tisa lam tâna tuhtu chuan tisaa mi chhiatna a seng ang a, Thlarau lam tâna tuhtu erawh chuan Thlarauva mi chatuan nunna a seng dâwn si a.

avatar
1 Comment threads
0 Thread replies
0 Followers
 
Most reacted comment
Hottest comment thread
1 Comment authors
Do Sian Khual Recent comment authors
  Subscribe  
newest oldest most voted
Notify of
Do Sian Khual
Guest
Do Sian Khual

Amen ka tan chaw thatak ani a va hlu em

Copyright © 2017-2020 Our Daily Bread Mizo.
Privacy Policy