NGAIHDAMNA NUN

— TL Rema
Tahan, Myanmar

Mihring fapa kraws-a an khaikân hnu, thi tûra an dah khan thuchah ropui tak leh chhinchhiah tlâk tak thu (words) pasarih lai mai min hnutchhiah a. A thuchah te chu:

(1) “Ka Pa, anni hi ngaidam rawh; an thiltih hi an hre lo a nih hi,” a ti a (Lk.23:34).
(2) “Vawiinah hian Ka hnenah paradis-ah i awm ve ang” (Lk.23:43).
(3) “A nu hnenah, Hmeichhia, en teh, i fapa kha! a ti a. Tin, zirtîr hnênah chuan, En teh, i nu kha! a ti a”.
(4) “Ka Pathian, Ka Pathian, engah nge mi kalsan?” (Mt.27:46-47; Mk.15:34-36).
(5) “Ka tui a hal e” a ti a (Joh.19:28).
(6) “A kin ta” leh
(7) “Ka Pa, i kutah ka thlarau ka kawltîr e” (Lk.23:46).

A thuchah tamtak zîngah hringfa te tâna ngaihdam a dîlsakna chungchang hi kan chhui ber tûr chu a ni.

Khawvêlah a lo lan phat aṭangin dodalna tamtak a tâwk nghal a. Amah avangin naupang pawisawi lo tamtak ten nunna an chân phah a. Khawvêlin a lawm loh vang chu alawm ran chaw pêkna thlêngah a mut a ngaih tâk ni. Inngaihtlâwm vang chu ni tho mahse Setana bum nâna thil tih a ang mah zâwk a. Hrilhlâwkna thu tih famkimna pawh a ni. Lal inah piang nise chuan a pian ni la la khan tihhlum a ni nghal ngei ang. Chatuan remruat tu chu a duhna hmun ngeiah piangin hmân ata tawh zâwlnei ten an lo hrilhlâwk ṭhin kha a rawn nemnghet ta char char mai a ni. Isua zinkawng hi lehkha ziak thiam deuh ina a duhdâna a changtute a herkawi leh drama a chantîr ang deuh hi a ni a.

Chutia ka han sawina chhan chu Zâwlnei ten an lo hrilhlâwk rêng rêng kha Isua nunah hian a thlen dik vek vang a ni. Hetah hian Setana chu Pathian kuthnuaia awm a ni tih hi chiang takin hmuh theih a ni. Mahni zinkawng tûr hre lâwk chunga han kal chu a harsa ngawt ang le. A mission-ah sawisêlna leh harsa han tih deuh pawh a nei hran lova, Kraws kawng han zawh dâwn meuh chuan mihring fapa tân a harsa ngang aniang. “Aw ka Pa, a theih chuan he no hian mi pêl lul rawh se; nimahsela keima thu ni lovin, nangma thu thu ni zâwk rawh se,” tiin a ṭawngṭai a nih kha.

Chutia kraws-a an khenbeh khan sawisêlna leh diriamna nasa tak mai a tâwk a. Amah zuitu te ngeiin an tlanbosan leh zêl nên, a mi rin êm êm leh an zînga huaisen ber lahin vawi 3 lai a phatsan tawh lehnghal a. A chan chu a va lainat awm tak êm! Vântirhkoh pakhat tirh a mission zo thei mai kha hmangaihna avângin siamtu’n a thil siam chhanchhuah hna a rawn thawk ta a ni. Mihring lam aṭanga ngaihtuah chuan hrilh a haiin thinrim a awl hlê ang. Mahse a pa hnênah ngaihdama an awm theih nân a dîlsak tlat mai. Eng vanga dîlsak nge a nih? A sawi zawm leh a, “an thil tih hi an hre lo a ni,” a ti. A dik, amah khengbet tute khan tu nge an khenbeh kha an hrechiang lo rêng rêng. Setana chu a rilru a hah hlê ang heng hunlai hian. Isuan a mission a hlawhchham theih nân theihtâwp a lo chhuah ve bawk kha.

Amah ngeiin mi tamtak a lo ngaidam tawh a, ngaidam tûrin a zirtîr bawk. Chu ngaihdamna nun a taka hmangtu pawh amah tho a ni. Min ngaihdam avanga chatuan nunna nei thei kan ni si a. Keini amah ringtute hian he a thihna hi “kan hlut tak tak a nih chuan” ngaihdamna nun ngei kha a taka kan nunchhuah (tih lan) hi a ngai tak zet a ni.

❤️ Matthaia 18:21-22, Chu mi lai chuan Petera a lo kal a, a hnenah, “Lalpa, ka unauvin vawi engzat nge ka chungah thil tisual sela ka ngaihdam tur? Vawi sarih thlengin em ni ang?” a ti a.
❤️ Isuan a hnenah, “‘Vawi sarih thlengin,’ ka ti lo va che. ‘Vawi sarih hmun sawmsarih thlengin,’ ka ti zâwk che a ni.