MI HUAISEN CORRIE

MI HUAISEN CORRIE

KOLOSA 3:16
Krista thu chu, a hausakna zawng zawng nên nangmahniah chêng rawh se. Fakna hla te, Pathian hla te, Thlarau lam hla te nên finna tinrêngin inzirtîr ula, infuih tawn rawh u. In thinlung taka Pathian chawimawiin hlim takin zai rawh u.

Indopui II-na lai khan Nazi Germany-ah chuan Bible hi neih leh chhiar an phal rêng rêng lo a. An sawi dân pawh ‘Lehkhabu dawheh’ (Book of lies) tih a ni.

An mi mante an hnawhkhâwmna hmun pakhatah chuan hmeichhia 700 lai an dah a. Khuahkhirhna nasa tak hnuaiah an awm a. An awmna hmun chu a tenawmin a hrehawm êm êm a, hrikhrah tam tak a awm a, chuvang chuan a vêngtu pawh an lût peih zen zen lo a. Uluk takin a pâwnah an vêng tawp mai a ni.

Corrie Ten Boom-i pawh chu tâng zîngah a tel a, kristian ṭha tak a ni. Vêngtuten an mitâng awmkhâwmna hmun hrehawm tak an luh duh lohna chu Corrie tân chuan remchâng tak a ni.

Chu hmunah chuan mi tam tak an awm avângin Corrie chuan ni khatah hmun hnihah Pathian thusawina hun a nei ṭhin a. Tângmi mi tam tak chu ringtu-ah a siam hman nghe nghe a ni.

Chutia ni tam tak rawngbâwlna a neih hnu chuan tânin vêngtu an thlâk tûr thu an rawn hriattîr a. Chu vêngtu thar chu hmeichhe kawlh tak a ni a, tânina tângte awm dân dik lo rêng rêng chu an hotute hnênah a thlen ṭhin a. Corrie chuan huaisen takin Pathian thu a hril zêl a, zêp a tum lo a, thup a tum bawk lo a, tân in vêngtu pawh zah zo lovin miten Pathian an rin ve theihna tûrin a hma-a tih tûr chu a ti pawp pawp mai a ni.

Ni khat chu vêngtu chuan an thâwm a hria a, a rûkin a ngaithla a, mahse Pathian hnathawh a chungah a lo thleng a, an hlasak chu a ngaithla kham lo a, an sak zawh chuan an hmuh loh lam aṭangin, “Vawi khat tal han zâi leh teh u,” a rawn ti a. Tu nge an hre lo a, mahse tân in vêngtunu sual tak mai kha a lo ni reng mai a. Corrie chuan chhandamna kawng hrilhin a piangthar ta a ni.

ROM 1:16
Chanchin Ṭha hi ka zahpui si lo va, tu pawh a ring apiangte chhandam nâna Pathian thiltihtheihna a ni si a; Juda-te tân a ni phawt a, Jentail-te tân pawh a ni leh a.

avatar
  Subscribe  
Notify of
Copyright © 2017-2020 Our Daily Bread Mizo.
Privacy Policy