Eng vângin nge kan rawngbâwlna hian rah duhawm zâwk a chhuah har tâk êm êm?

Eng vângin nge kan rawngbâwlna hian rah duhawm zâwk a chhuah har tâk êm êm?

— Chhantea (Oriela patea)
E. Lungdar

1. Kan rawngbâwl dân a bîkin tualchhûnga kan chêtvêlna hi en ngun a ngai ta hlein ka hria. Kohhran hmêl lanna a bîkin ṭhalai rualte kan chêtvêlna langsâr ber ber te hi Pathian ropuina tûr leh members hla zâwkte tâna tel ve châkawm te hi a ni ta lo deuhin a lang ta.

Members hlâte tâna zan khat pawh ṭawngṭai programme siam hi harsa kan ti ta hlein a lang a. Chumai nilovin Pathianni tlai khat lek pawh chaw ngheia an puala hun hman te hi kan harsat ta niin a lang. Kan chêtvêlna langsâr tam tak hi chu a hlimawm leh a nuam zawng deuh hi niin a lang ta, a huho nun piahlamah mahni leh midangte tâna Pathian hmaa kûnna nun ah te hian kan pachhe ta lutuk te hi niin a lang.

2. Takna nun hi kan tlachham êm êm bawk niin ka hria. Tak kan va tih hian landâna inlâk mûk leh hmêlhmang intih ûp lam nilovin, kan chêtvêlna boruakah zâwk hian a ni ka tih ni. Mahni awmna whatsapp group ṭheuh hi lo chîk teh u. KṬP, ṬKP, SAY, PYD, Pavalai etc. hetiang group-ah pawh hian kan chêtvêlna thil bâkah Pathian thu han chaihona leh sawihona lam aiin fiamthu hian hun kan hmang ral tam ta lutuk a ni lo maw? Heng group kaltlang te a members hla zâwk te tâna tel ve leh inhnimphûm ve châkawm taka siam ai chuan a awmsa te hlim tlânna leh infiamna atâna kan hman hi kan duhtâwk hlawm ta niin a lang ta, hei hian a lantîr lian tak ni a ka hriat chu kan rawngbâwlnaah hian Pathian hi a hming maiin kan lam a, a langsâr chu keimahni kan ni mai ni hian a lang.

3. Chanvo leh nihna ah kan buai em em a, a langsar lam a piang hi kan bawh emaw tih mai tur hi ani a, chu chuan kan rawngbawlna ah chuan Pathian aiin mahni kan lansarhna kan zawng ta niin a lang deuh in ka hria. A langlo lam a rim tak a thawh leh inpekna lam tur prog hi a tlem ta tulh tulh ni hian a lang ta.

4. Kohhran tâna inpêkna tak tak hi kan tlachham chho zêl niin a lang bawk. Kohhran ngaihpawimawhna te hi mitin nunah a tlahniam ta lutuk te hi eng vang nge ni ang tih hi i chhût ang u.

Chumai a ni lo, kohhran huang chhûngah chuan KṬP, ṬKP, SAY, PYD, Kohhran Hmeichhia, Pavalai etc. chanvo kan neihnaah chuan ṭhahnem ngai êm êm, mahni chanvo pawh hlen ṭha zêl, mahse, kan tel lohna leh kan lan lohna thilah chuan inkhâwm thleng pawha thlahdah kan ni ta. Heng hian keimahniah nghawng a nei lo anih pawhin kan rawngbâwlsakte-ah rah va chhuah hi a ti har êm êm a ni.

5. Kohhran kaltlangin chanvo hrang hrangte kan chelh ṭhin, heng kan chanvo te hi keimahni nihna kan lansarhna tûr nilovin Pathian lansarhna tûr a ni tih kan hre lo lek lekin a lang. Mahni zahawmna atân lek kan hmang ni ta hian a lang. He chanvo ropuizia leh mawhphurhna sân zia hi hrechiang ila chuan tûn aia nung hian rawng kan bâwl hi ka va ring êm!

NEHEMIA 2:17-18
Chutichuan an hnênah, “kan chan a chhiatzia hi in hmu a, Jerusalem a ram tih te, a kawngkhâr te a kang tihte pawh in hria a: hawh u, sawichhiat kan nih tawh loh nân Jerusalem kulh chu i din leh ang u,” ka ti a. Tin, ka Pathian mi duhsak thute ka hrilh a, ka hnêna lal thu sawite pawh. Tin, anni chuan, “I tho vang u khai; i din teh tak ang u,” an ti a. Chutichuan chu hna tha thawk tûr chuan an kut an tichak a.