ARSI LO CHHUAK TÛR

NUMBERS 24:17
Nakin hnua a awm dân tûr ka hmu a, Tûn mai piah lam ka hmuhsak a: ‘Jakoba aṭangin lal tiang a lo chhuak ang a, Israela aṭangin arsi a lo chhuak ang a, Moab ram tluanin a chhun tlang ang a, Setha thlahte a titlâwm ang.

He lai thua Jakoba aṭanga Arsi lo chhuak tûr a sawi hi Lal Isua lo pian tûr thu a sawina niin a lang. Jakoba chu Isaaka fa (Esauva phir khing) a ni a. A naupang zâwk mah ni se Pathian thiltum tihhlawhtlin nâna buatsaih chhoh a ni a. Peniel hmunah Lalpa vântirhkoh nên an inbuan a, a hming pawh Jakoba ni tawh lovin, ‘Israela’ tih a nih tawh tûr thu pawh hriattîr a ni a. Jakoba chuan fapa 12 a nei a, a thlah kal zêl aṭang chuan Isua Krista a lo piang ta a. Abrahama aṭanga Krista thlengin chhuan 42 a ni.

He inlârna hmutu hi Beora fapa Balaama a ni a. A hmuh ang tak hian Messia (Krista) chu lo piangin Bethlehem ran thlêngah a lu a nghat a. Zâwlnei mita lo hmuh lâwk chu a takin a lo thleng ta a ni.