VÂNRAM BANK

2 PETERA 3:9
Ṭhenkhat rin dân angin Lalpa hi a thutiam hlen kawngah a muang lo ve; in tân a dawhthei a nî zâwk; tû ma boral a duh lo va, mi zawng zawngin an sual an sima, a hnêna an kîr a duh vâng zâwk a ni.

Kristiante kan vanneihna êm êm chu Pathian nung kan neihna hi a ni. A thutiamah a ding nghet tlat a, a nghîng lo a, a buai lo a, engzâta tam pawh ni se a tiam tawhah a inchhîr lo a, a sût leh ngai hek lo. Malsawmna leh lawmman min tiam hi a sâng em a, mihringte hian kan dawng sêng lo zâwk a ni.

II Korinth 1:20-ah chuan, “Pathian thutiam zawng zawng chu amahah chuan, “A ni,” tih vek a ni;” tih kan hmu a. Hei hian kan Pathian rinawmzia a tilang chiang hle âwm e.

Rev. William Chapman-a kha West Coast, America-ah Pastor hna thawk tûrin a insuan dâwn a. A kohhran hmasa a chhuahsan hmâ chuan Kohhran member pakhat hi a hnênah a rawn kal a, Rev. William Chapman-a hnênah chuan lehkha vâra intuam hi a rawn pe a. William Chapman-an a han hawn chuan cheque ziak loh in sign sa vek (Blank cheque) hi a lo ni a.

Chupa bank account cheque chu a ni a, Pastor hnênah chuan, “I mamawh zât tûr ka hre lo a, chuvangin i mamawh zât pawisa i la chhuak mai dawn nia,” a ti a. William Chapman-a chu a lâwm êm êm a, Pathian ṭhatna leh rinawmna avang niin a hria a ni.

Mi hausa tak hnen aṭangin cheque signed sa ziah loh dawng ve ta ila engtiang takin nge kan lâwm ve ang?!

Eng pawh ni se Vânram Bank kan nei a, chu Bank cheque chu Isua Kristan, Pa Pathian aiawhin a signed vek tawh a, Thlarau Thianghlim kaltlangin min pe ta a ni. Chu chu Bible-ah chiang takin kan hmu a. Engah nge kan mangan ang!

FILIPI 4:19
Ka Pathian chuan Krista Isuaa a hausakna ropui tak aṭangin in mamawh tinrêng a pe ang che u.