Nun Kawng Chaw

KRISTIANNA LEH POLITICS

KRISTIANNA LEH POLITICS

— Chhantea (Oriela patea)
E. Lungdar

AMOSA 5:24
Nimahsela, rorêlna dik chu lui angin luang sela, felna chu luipui kang ngai lo angin luang rawh se.

Zoramah hian politics leh sakhuanna (kristianna) hi thil kal kawp thei lo, inpersan daih anga ngaihna hi a tam khawp mai. Pulpit tlâng aṭanga politics sawi leh zahmawh sawi chu thil thianglo ang riakah kan ngai a. Politics hi kohhran (sakhuana) huangah a leng lo va, chutiang bawkin politics huangah kan kristianna pawh hi a lenglo-ah kan ngai a ni berin a lang.

Politics hi a dik lo lo va… a chhûnga chêng ten kan hman dik loh avângin a lang dik lo zâwk a ni. Kan kristianna nen a inmil lo a ni lo va, kan politics huang chhûnga kan thiltih duh tam tak hi kan sakhuana (Kristianna) dân nên a inremloh vâng zâwk a ni.

Kan ram politics hi mi pamham te, duhâm te, hlêp rûk chîng te khelh atân ngawt chuan a uiawm lutuk. Rorêlna dik leh ṭha leh fel nei tûr chuanin Pathian ṭih mi, mi dik leh rinawm zâwk ten politics huang chhûnga Kristian nun dik tak a lang leh lang lo a pu lût ngam mi lo inpe ngam se… hei ai hian hma kan sâwn leh zual ngei ang.

Kan kristianna nun nêna politics khêl ngam politician dik tak tak hi tam tak an awm. Politics anih tâk avânga mi zawng zawng hmuh dik loh ngawt hi a dik bik lo. Chutih rualin Kristianna hi kâwrah hmang a, politics luhchilh a thuneihna chan vêlah Kristian nunzia lan chhuahtîr leh silo ṭhin mi tute emaw vângin kan Kristianna êngah politics hi a hmai a mâwk ṭhin zâwk a ni.

Kan ram leh hnam hi a dam loh chuan kan sakhua hi a him bîk dâwn lo va, chu vâng chuan kan ram leh hnam chhan tûr hian kan Kristian nun nêna politics kan khelh hi a ṭul tawh takzet zâwk a ni.

Pathianin a thu malsâwm rawh se.

One Comment

  1. A va dik chiang ve.

Leave a Reply

Your email address will not be published.

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.