BEISEINA

BEISEINA 2

— Vanlalhlanzeli
Chawnpui, Aizawl

Mihring nuna mawi leh hlu em em, ṭhenkhat tân erawh sawi rik ngawt pawha thin tirim thei, chutiang chin tawh chu mi khawngaihthlâk ber an ni. A ni asin, beiseina nei tawh lo mihring chu dam reng chungin an thi a, an nun ‘Damlai hremhmun’ a chang ṭhin.

Ringtute kan vanneih em emna chu, mihring lamah beisei tûr reng reng awm tawh loh hnu-a beiseina ropui ber, Pathiana beiseina hi. Aw ringtu, Pathian beisei rawh, a hnên aṭangin thil ropui beisei rawh. Rinna hmasâwn nana kawng pawimawh ber te zing ami a ni. “Rinna hi thil beiseite awm ngeia hriatna, thil hmuh lohte hriatfiahna a ni (Hebrai 11:1)”.

I nun-in vanduaina a mikhual a, chu khual ṭha lo chu a châm hlen dâwn takngialin i hre ṭhin em? Chhungkaw natna, thihnain min rûn a, a mi fan a nâ a ni tiraw; innghahna ngawih ngawih te an liam ni chuan. Miin i nâ an hmu thei lo, pâwn lama hlim taka nui ṭhin i nih vâng em ni mal ni-ah i ṭah rûk fo? Hmangaih mamawh ngawih ngawiha seilian, “A chhel lutuk” tia an thlîr liam kha, thinlung chhûngril no ru pai rûk khân a beisei a hmu ta nia inngaiin, bei tidawng zual leh hliam belhtu an nih châng a awm ṭhin em? Hma lam hun beiseina nêna i lo duan lâwk, i thleng ṭep tawhin i hria a, rim takin i bei. Mahse, mit khap kâr lova tihchhiata a awm ni chuan beiseina chu a hliam a. A êng pawh a chuai ṭhin a ni tiraw? Khawvêl leh mihringa beiseina neih chuan chhiat a tawh niin chhâwkna a pai tel lo, beiseina tibeidawngtu a ni. Pathian chauh beisei phawt mai rawh.

Pathian beiseina êng chu eng chhiatna mahin a timit zo lo, a êng reng châwl lovin. Matthaia 9:18-19 ah khan, a fanu thi tawh tinung leh tûr beiseina nei chanchin kan hmu. Ngaihnawm tak a ni. Chu beiseina chuan rinna a siam a, rinna chuan Pathian a chettîr ṭhin. Mitthi tawh pawh kaihthawh a nih kha.

Dam chhûng khawsaknaah te, mimal nun, taksa leh thlarau nunah pawh, thil ṭha, thil ropui inthup te, i nih phâka i rin loh kha i ni thei a ni, Pathian ṭanpuinain i ti thei a ni tih beiseiin inhrilh nawn fo teh le. I ṭawngkam chhuak hmangin midang mai bakah nangmah ngei pawh malsâwmnain hlân ṭhin rawh.

Pathian ṭanpuina leh a malsâwmna, a chêtna dâl thei tûr zawng zawng nangmaha bet, Pathian laka inkiltawih tîrtu zawng zawng che paihbovin. Chu chuan engkimtitheitu nêna inzawmna thûk zâwk a siam dawn a, i duhthusam ang diak diakin thleng lo mah se, a aia ṭha zâwk ruattu, amah nên engkim in hmachhawn dûn tlat tawh dâwn avângin beiseina a beidawng ve ngai lo ania. “Mi tichaktuah chuan engkim ka ti thei a ni (Phillipi 4:13)” tiin, Pathianin nangmaha thil ropui inthup a dah hai chhuah loh te, mak tak leh ropui taka siam i ni tih hrilhtu che hian i ni a tih chu i nihna a ni tih pawm chungin, beiseina mit thei ngai lo Isuaa beiseina nên dam ni chhiar ve rawh le.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.