HRIPUI KÂRAH HETI ZÂWNG ZÂWK HIAN

— Chhantea (Oriela patea)
E. Lungdar

Kohhran hian thawhlâwm/thilpêk aiin berâmte thlarau dinhmun ngaihtuah ngun a ngai ta. Hrî avânga boralna kawngkaa dâk reng berâmte zingah hian chatuan nunna kawng la hmu lo tam tak an awm si a.

Pathian ram chhiar aiin kohhran mite thlarau lam nun chhiar uluk a hun ta e, thilpêk bansan ang u kan tihna erawh a ni lo.

Mipuite hian tûn hi Lalpa zawn hun a ni tih hriain kan thlarau lam chaw hi i châk zual deuh deuh ang u. Kan hmaah hian eng nge lo thleng dâwn kan hre silo. Kan nunna, chhûm reilote lo lang a ral leh ta ang lek himna aiin chatuan a nunna kawng hi kan zawn a ṭul ta e (ni tin eikhawp erawh dîl chungin kan thawk ang).

Hripui avangin khawvêl hi a châwl a, kan thlarau nun leh kan khawvêl hun erawh a châwl ve silo. Thlarau bote kan seng khâwm thei lo anih pawhin mahni thlarau tal chu Krista lamah i seng khâwm ang u.

Hripui lêng hi Pathianin a mi ni tûra min kohna-ah ngai ila. A mi ni tûra inlamlêt erawh kan tih tûr a ni. Vei tûr dik, ngaihven tûr dik i ngaihven ang u.

A pawimawh ber chu mahni thlarau lam nun a ni, a dawtah chuan Pathian avânga kan rawngbâwlsakte thlarau lam nun hi a ni. Hawh u… hun ṭha hripui kâra kan neih hi, heti zâwng zâwk hian i hmang ang u.

MATTHAIA 6:33
A ram leh a felna chu zawng hmasa zâwk rawh u; tichuan, chûng zawng zawng chu a pêk belhchhah dâwn che u nia.