INCHHUANG

2 KORINTH 12:9
Ani chuan, “ka khawngaihna i tân a tâwk e, ka thiltihtheihna hi chak lohnaah asin tihpuitlina a awm ṭhin,” mi ti a. Chuvângin, Krista thiltihtheihna chu keimaha a chên theih nân ka chak lohnate hi lâwm takin ka chhuang tawh zâwk ang.

Tirhkoh Paula’n chak lohna a nei a, chu a chak lohna chu a duhdân a ni bîk hauh lo, a tihsual avânga Pathiana a chak lohna a ni thei a, mihring a nih hnu-a a famkim lohna pawh a ni thei e. Mahse chu a chak lohna chu a chhuang tlat zâwk si a ni.

Keini rawngbâwltu tam takte hian chaklohna kan nei a, kan chaklohna te hi chhuan dân dikin kan chhuang em? Kan tih ṭhat duh loh avânga chaklohna hmatheh fo mi kan ni em?

Paula’n chaklohnaa lâwm a tih hi chak loh avânga lâwm hrim hrim a tihna a ni lo a, mahse chu tuarna, harsatna, tlin lohna chu kawng dangin a thlîr a, chu chuan thil ṭha zâwk a thlenin emaw a tâna Pathian remruatna kawng ropui zâwk a nih dân a zir thiamin a chhuang ta zâwk a ni.

Chakna-in Pathian hmêl a hliah si chuan chhuan tûr a ni lo a, chak lohnain Pathian hmêl min hmuh tîr anih chuan chhuan tur zâwk a lo ni.

HIV AIDS vei hmeichhe pakhat hi nun hrehawm takin a awm a, a bialpa nêna sex an hman aṭanga kai a ni awm e. A bialpa leh a chhûngten an hre lo a, amah lahin a hrilh ngam hek lo a, mahse chu natna tihdam theih loh, mualphona keng tel natna ni bawk si chuan beidawnna ruamah a hnuk lût a, mahni intihlum a tum mêk lai chuan Pathian a au ta tlat mai a, Pathianin a lo chhâng a, thlamuanna duhawm tak a pe a, a awmpui ta a. HIV AIDS veina ram aṭang chuan a piangthar a, chhandamna a chang ta si a ni.

Chu natna chu vei a ṭha e tihna a ni lo a, HIV AIDS hrik vei lo a pianthar loh ai chuan HIV AIDS avanga pianthar chu a ṭha a, piantharna hmanrua chu a chhuanawm a ni.

2 KORINTH 12:5
Chutiang mi chu ka chhuang dâwn; nimahsela, ka chak lohnate lo chu mahni ka inchhuang dâwn lo.