MARI (ISUA NU)

LUKA 1:26-27
Tin, a thla ruknaah chuan Pathianin vântirhkoh Gabriela chu Galili rama khaw pakhat, Nazareth an tihah chuan nula thianghlim pakhat hnênah a tîr a, chu nula chu Davida thlaha mi, a hming Josefa nupui hual a ni a; nula hming chu Mari a ni.

Mari nu leh pa leh unaute chanchin hi Bible-ah hian hmuh tûr a vâng hle. Zakaria nupui Elizabeti hi a laichin nu a nih thu erawh târlan a ni. Hetiang a ni chung hian khawvêl chhandamtu Isua Krista pian thuah hian hmun pawimawh ber a luah thei a, a ropui hlê. Mari hi Galili biala Nazaret khuaa nula thianghlim a ni.

Mari hi Josefa nên innei mai tûrin an inhual lâwk vek tawh a. Juda dânah an inhual tawh hnua mi dang an mutpui chuan uire anga ngaih an ni a, lunga den hlum tûr an ni (Deut.22:23). Hetiang dinhmuna a din mêk lai hian Gabriela’n Isua a pai tûr thu a rawn hriattîr a, den hlum mai theih dinhmunah ding mah se Isua pai tûrin, “I thu ang zêlin ka chungah thleng rawh se,” a ti thei a ni. A tawrh ngamnain amah a chawimawi ta a nih chu!