A RING APIANG

A RING APIANG 1

JOHANA 3:16
Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.

Sadhu Sundhar Singh-a chuan tihian a sawi: “Vawi khat chu tlâng rama ka zinnaah, lungpui chungah ka ṭhu hahchâwl a. Ka chawlhna lungpui thlanga thing bukah chuan Sava bu a awm a. Nakinah chuan chu Savapui chu a note te tâna chaw rawn pu chungin a lo haw ta a. A note-te chu chaw a pêk zawh hnu-ah a thlâwk bo leh ta a ni.

Chu Sava note te mit chu a la keu lo a, engmah an la hmu thei lo. Mahse an nu lo kal thâwm an hriat chuan an lo lâwm a, an kâ an lo âng vêl a ni. ‘Ka nu ka hmuh hmâ chu ka âng lo ang, ka nu nge midang pawh ka hre si lo a’ ti ta se, rilṭamin an thi ngei ang, a chhan chu an la hmu thei si lo a. Mahse an nu chuan a hmangaih a ni tih an hria a, an ringhlel lo a, an tân chaw tak a rawn hâwn dâwn tih an beisei tlat a ni.

Rei lo te-ah an mit te chu keuvin an pui pawh chu a takin an hmu thuai dâwn a, anni ngei pawh chu boruakah chuan thlain an la lêng vêl dâwn a ni tih pawh an ringhlel lo a ni.” tiin.

Keini mihring, thilsiam zînga lu berte hian chung rannungte chu kan tluk em? Keini zawngin Pathian hi a awm tih leh min khawngaihtu a ni tih hi kan ringhlel tlat ṭhin. “Ka ring, ka pawm, rinhlelhna rêng rêng ka nei lo,” kan tih lai hian kan thil tih aṭangin rin tak tak leh tak tak loh a lang si a ni.

Kan Lalpa chuan, Johana 20:29-ah khân, “Mi hmuh avângin mi ring a ni maw? Hmu lova ringte chu an nihlawh e,” a ti.

Pathian lama thinlung hawng tawh a, amah aṭanga thlarau lam chaw dawng tawhte chuan puitlin hun leh amah nêna chatuana chênhona hun chu kan la tawng dâwn a ni.

ROM 10:4
A ring apiangte thiam chantîra an awm theihna tûrin, Krista chu Dân tibângtu a ni si.

avatar
  Subscribe  
Notify of
Copyright © 2017-2020 Our Daily Bread Mizo.
Privacy Policy