MAHNI INHLAN

ROM 5:8
Nimahsela, Pathian chuan a mi hmangaihna chu fak tlâkin a lantîr a, mi sualte kan la nih laia Krista kan aia a thih avâng khân.

Midangte chunga ṭhatna lantîr hi a hlu takzet. Malsâwm dawnna a ni. Mahse chânna tel lova induhsakna emaw ṭhatna lantîr hi a hlu hranpa lo. Fapa tam tak aṭanga tu emaw ber rawn tîr lovin fapa mal neih chhun liau liau a rawn tirh avângin Pa Pathian min hmangaihna chu a hlu takzet a nih tih kan hriat kha. Chutiang rilru chu pu ve tûrin min ti a ni.

Pathian thu-ah chuan ti hian kan hmu, “Krista Isua rilru ang hi nangni pawhin pu zêl rawh u. Ani chu Pathian anpui ni mah sela, Pathian tluka awm chu tum tlat tûrah a ngai lo va, mahni intitlâwmin bawihah a insiam a, mihringa lo piangin mihring a lo ni ngei na a, a inngaitlâwm a, thi khawp hialin thu a zâwm a, krawsah a thi ta a.” – FILIPI 2:5-8.

American mi thawnthu tawi ziak thiam, O. Henry-a khan hetiang hian Krismas thawnthu a ziak:

Krismas present inpe tawn duh nupate kha an retheih êm avangin pêk tûr ṭha an nei lo ve ve a. Mahse an pahnih chuan tu mah inhrilh tawn lovin an neih hlu ber chu hralh a, thil inleisak an tum a. Hmeichhia chuan a sam mawi tak, rangkachak rawng a chhuan êm êm chu sam siamna dâwrah a hralh a, a pasal tân sana hrui rangkachak-a luan a leisak ta a.

Mipa pawh chu sana dâwrah kalin a sana ṭha tak chu a hralh a, a nupui sam mawi tak khuihna tur Samkhuih nalh leh changkâng tak a leisak ta a.

Krismas a lo thlen chuan an han in-present ta a, sam khuih tûr a awm tawh lo a, sana hrui lahin awmzia a nei tawh hek lo, hlutna an nei tawh lo. Mahse thilpêk a zawnga hlu ber anmahni ngei an inpe a ni tih an hrechhuak a. Lâwm avângin an inkuaha an ṭap dun ta kauh kauh mai a. Hmangaihna tak tak zâwk chu an chhar chhuak ta a ni.

1 KORINTH 10:24
Tu pawhin mahni ṭhatna tûr mai zawng lovin mi dang ṭhatna tûr zawng zâwk rawh se.