ISUA KAWNG BUATSAIHTU

MARKA 1:2-7
Zâwlnei Isaia lehkhabuah, “Ngai teh, ka tirhkoh i hmaah ka tîr a, Ani chuan i kawng a siam ang.” “Thlalêra mi au râwl chuan, ‘Lalpa lamlian sial ula, A kawngte tingîl rawh u,’ a ti,” tia ziak ang khân, Johana, thlalêra baptistu kha, thil tihsual ngaihdam nân simna baptisma thu hrilin a lo chhuak a. Tin, Judai rama mi zawng zawng leh Jerusalem khuaa mi zawng zawngte an chhuak a, a hnên lamah an kal a, an sualte thupha chawiin Jordan luiah chuan a hnênah baptisma an chang ta hlawm a. Tin, Johana chu sanghâwngsei hmul puanin a inthuam a, a kâwng chu savun kâwnghrênin a hrêng a, a chaw chu khaukhuap leh ram khawizu a ni. Tin, “Ka hnungah keimah aia ropui zâwk a lo kal mêk a ni; kûna a pheikhawk hrui phelh tlâk pawh ka ni lo ve.

Hmânlaiin lalten an ram chhûng an fan dâwna an inbuatsaih dân hei hian a târlang. Hetih hun lai hian lalten an bial an fan dâwnin mipuiin kalkawng an LO buatsaih theih nân a hrilh tûrin mi an tîr hmasa ṭhin.

Nau piang lâwm tûra kan inbusatsaih mêk lai hian kan thinlung tlângsângte râwt hniamin a khuar laite hnawh khat ila, a kual laite la mar ila. Johana’n inngaihtlâwmna puan sina a pheikhawk hrui phelh tlâk pawh nia a inhriat loh hialna rilru ang kha puin, kan Lal Isua pianna tûr kawng hi i buatsaih ve ang u. Kan Lalpa hi a tlâwm êm avângin thinlung inngaitlâwmah lo chuan a piang thei ngai lo a ni.