THILPÊK HLU

1 THESALONIKA 5:14
Tin, unaute u, ka ngên a che u, mi dâwngdahte zilh ula, mi beidawngte chu thlamuan ula, mi chak lote ṭanpui ula, mi zawng zawng dawhthei rawh u.

Krismas hun a ni a, mitinten thilpêk (present) hlu tak tak an inpe ṭhin a, a man a to emaw to lo emaw a dawngtu tân chuan a lawmawmin a hlu êm êm vek a ni. Chutihrual chuan thilpêk hlu ber kan inpêk theih hi eng nge ni ang le?

Ralph-a chu kum 4 mi a ni a, fapa neihchhun a ni a, a nu leh pa chu sawi loh a pi leh pu, pate-a, nute-i te zawng zawngin an duat rawn a, a duh apiang a nei a, a mamawh loh leh duh loh pawh a nei tho. A room chu naupang lawm zawngin a khat a ni ber. Chu mai a ni lo a, car nalh tak an nei a, an lêng chhuak fo ṭhin a ni.

Zan khat chu a nu leh pain an dân pangngaiin T.V. an en a, Ralph-a chuan Krismas-a a duh zâwng hrilh tumin biak a tum ṭhin a, mahse a nu leh pa chuan T.V. programme pawimawh chhuah zawh-ah tiin an hrilh a, tichuan Ralph-a pawh chuan a nghâk ta mai a.

T.V. programme pawimawh a chhuah zawh chuan a nu leh pa chuan, eng nge a duh an zâwt a? Thil tam tak a neih avângin a duh zâwng chu thil tam a nih pawh an ring lo a.

Ralph-a chuan, “In awm loh laia ka lênna ṭhin thing ker thiam a pu nên khân kan inkawmngeih êm êm a, amah pui tûrin thing nawi la tur te’n min ti ṭhin a, kan tih zawh chuan chhûnah thingpuite kan in a, tichuan thawnthu min hrilh a, kan infiam ṭhin. Naktûkah pawh bâwng chaw pêkna thlêng kan siam dâwn a, tuboh ṭha tak a mamawh êm êm a, pêk ka duh a, a chhan chu ka tân hun tam tak a hmang ṭhin a,” a ti a.

Ralph-a nu leh pa chu ngawi rengin an inen a, an fapa chuan sum tam takin a lei theih loh thilpêk a phût tih an hrethiam nghal a. Chu chu ‘hun’ a ni.

Kan fate, kan nu leh pate, kan pi leh pute, kan u leh naute tân hun pêk ve hi, Kohhran, khawtlâng leh pâwl hrang hranga kan inhmang anih pawhin a pawimawh hlê tih hriat a ṭha e.