BAPTISTU JOHANA PIAN THU

LUKA 1:57-58
Tin, Elizabeti nau hrin chu a lo hun ta a; tichuan, fapa a rawn hring a. Tin, a vêngte leh a laichînte chuan Lalpan a khawngaih êm êm tih an lo hria a, an lawmpui a.

Baptistu Johana hi Lal Isua tân kawng buatsaih hmasatu tûra Pathian mi ruat a ni a. Gabriela’n a pa Zakaria hnênah – a pian tûr thu te, a hmingah pawh Johana sak a nih tûr thu te, Lalpa ngaiha mi lian a nih tûr thu te leh a nu pum chhûnga a awm laia Thlarauva a khah tûr thu te a hrilh a. Nimahsela a nupui, Elizabeti ching a nih bâkah an upa dûn tawh bawk si a, a awih lo va, chuvangin a ṭawng theih loh phah ta a. Johana a lo piang a, ni riat nia a serh an tan a, a hming an sak zawh veleh a pa chu a lo ṭawng leh thei ta a. Thlarau Thianghlimin a lo khat a, hrilhlâwkna ropui tak a chham chhuak nghe nghe a ni (Lk. 1:67-79).

Baptistu Johana hi Lal Isua pawhin a ngaisâng hle a, ”Hmeichhe hrin zîngah Baptistu Johana aia ropui zâwk an la chhuak ngai lo,” (Mt. 11:11) a ti hial a ni.