BERAMPUTEN CHIBAI AN BÛK

LUKA 2:20
Tin, berâm vêngtute chuan vântirhkoh hrilh ang ngeia engkim an hmuha an hriat avângin, Pathian chawimawi leh fak chung zêlin an kîr leh ta a.

Israel ramah hian inthâwina tûr berâm tam tak tak mi hausa ten an vulh ṭhin a. Mi rethei leh harsa deuh te an enkawltîr a, an chaw leh tui ṭhatna hmunah an riahpui ṭhin a. Chawlhniah te pawh ramah an awm a ngai a, sakhaw serh leh sâng tam tak an zawm ve theih loh avângin ngaihnêp pawh an hlawh ṭhin niin an sawi. Hetianga mi rethei berâm vênga awmte hnênah hian Isua pian thu hriattîr an ni a, chibai an va bûk ta a ni.

Berâmpute hian an berâmte sain a lo seh emaw miten an rûk emaw an ngaihtuah chang lo niin a lang. Lo bo se chuan berâm neituten an bân loh pawhin an rulhtîr a ngai ang, chungte pawh chu huamin nausên chibai an bûk a, an fakawm hle a ni. Berâmpute hnêna Isua pian hriattîr a ni ve hi Lal Isua hi mi rethei leh hnuaihnungte tân pawha lo kal a nihzia entîrna a ni. Engkim huamin nau piang Isua hi chibhai i bûk ve ang u.