KAN TÂN A LO KAL

PHILIPPI 2:6-7
Ani zawngin Pathian anga awma, Pathian tluka awm chu thil thlâkhlelh hleih theihah a ruat lo va, mihringte anga lo piangin, bawih angah a insiam a, amah leh amah a intitlâwm ta zâwk a.

Kum tak tak liamtaah khan Persia ramah Lal fing leh fel tak mai hi a awm a. A khua leh tuite chu a hmangaih hle a. Vawi khat chu an khawsak dân te, an harsatna te, an hrehawmna te hriatchian zâwk tumin an kalchhuak ta a.

A thuam mawi leh nalh, lum leh ṭha si chu a phelh a, hnathawh thuamhnaw a inbel a. Mi rethei tak ang leh kutdawh angin a inthuam ta a. A lan dân aṭang chuan tumahin Lal a nih hre tûr an awm rêng rêng lo. Chutiang chuan a mite chu a kan kual ṭan ta a.

Pûk pakhatah hian a lut a, chutah chuan pa pakhat, berh ve tak mai leh rethei êm êm mai hi a lo awm a. A bulah chuan a ṭhu a, a ei ang te chu a ei a, a in angte a in a, pangngai takin an inbia a, an inkâwm a. Tichuan lawmthu te a hrilh hnu chuan a chhuahsan leh ta a.

Ni rei lote hnuah chuan Persia Lal chuan pûk-a a lênnaah chuan a thuam famkima inthuamin a lêng leh ta a. Chupa hnênah chuan hmâna a pûka lêng kha amah anih thu a hrilh ta a. Chupa chuan mak a ti êm êm a, a awih loh lek lek a. Lal chuan chupa chuan thil a dîl ngei a ring a. Mahse a dîl hauh lo.

Ti hian a ti a, “Eng vangin nge i lênna tual nuam leh ropuina êng zâm vêl kalsana he lai pûk thim tak i rawn kal mai le. Ka hrehawmna mi rawn ṭawm a, ka ei leh in ang i rawn in a, min van tilâwm êm! Midangte chu i hausakna i pe a, ka hnênah erawh chuan nangmah ngei i rawn inpe a nih hi.” a ti a, lawmthu a hrilh ta mawlh mawlh zâwk a ni.

Philippi 2:8 – Tin, mihring anga lo awmin a inngaitlâwm a, thi khawp hiala thu zâwmin a lo awm ta a, krawsa thihna ngei chu.

LUKA 2:11
Vawiinah hian in tân Davida khuaah Chhandamtu a piang ta, Lal Krista chu.