NUNNA TUIKHUR

NUNNA TUIKHUR 1

JEREMIA 2:13
Ka miten thil pahnih an tisual si: Kei, nunna tuikhur hi mi kalsan a, Tuikhuah an ker a, tuikhuah khi, tui tling thei lo tûr chu.

Zin veivâk nu pakhat hi nau pawm chunga tlâng pang kawnga a kal laiin, a nau pawm chuan kawng sîra pangpâr mawi tak takte chu a hmuhin lawh tumin a nu bân aṭang chuan a zuang chhuak a, nimahsela tlâng pang awiah chuan a lum ta chiam mai a, a tâwpah chuan lungpuiah hian a lû a zuk sawh a, a ka pawh chhawn lovin a thi ta mai a.

Chu naupang himna leh damna chu chûng pangpâr mawi leh duhawm taka lang, mahse a thih phah tâkah te chuan ni lovin, a nu âwm nghênga awm mai chu a ni tih a lang chiang hle.

Chutiang chuan ringtu ni si ṭawngṭai nuna nung lo chu a khawsa ṭhin a ni. Chutiang mi chuan a châknate chawpa boral mêk khawvêl nawmchenna itawm taka langte chu a hmuhin hmangaihna leh enkawlna, nuin a tih theih ai pawha ropui zâwk daih chu theihnghilhin thlarau lam hnute a hnâwl a, Pathian ângchhûng aṭangin a zuang chhuak a, a thih phah ṭhin a ni.

Khawvêl hi, Thlalêra tui awm lo pui awm anga hmuh ṭhin ang a ni a. Thutak zawngtu chuan he khawvêlah hian a thlarau tuihâl tihrehna hmuh beiseiin a zawng ṭhin a. Mahse beidawnna leh hlawhchhamna mai lo chu hmuh tûr engmah a nei lo.

Nunna tui hi mihring siam chawp thil mawi leh ṭha aṭangin hmuh tûr a awm lo va, a siam chawp theih loh bawk. Ṭawngṭaina nên thinlung thianghlim tak pu-a Pathian lam pante chuan nunna tuikhur an hmu zâwk ang.

Chutah chuan lungawina te, chak tharna te leh chatuana nunna te an hmu dâwn a ni.

1 Johana 2:17
Khawvêl hi a châknate chawpin a boral mêk a ni; Pathian duh zâwng titu erawh chu kumkhuain a awm reng ang.

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.