AMAHA AWM

1 JOHANA 2:5
Tu pawh a thu pawm erawh chu amahah chuan Pathian a hmangaihna a famkim takzet tawh a ni. Amahah kan awm tih hemiah hian kan inhria a ni.

Sumdâwng pa hausa hian fapa pathum a nei a. Kum upa tawh tak anih avângin a sumdâwnna chu tu berin nge kengkawh chhunzawm ang tih a ngaihtuah nasa mai a. Zan khat chu a fate chu an pathum chuan a ko khâwm ta a.

Sumdâwngpa chuan, “Ka chhin dawn che u a, in zînga tiṭha berin ka sumdawnna hi a chhunzawm ang,” a ti a.

A in lian takah chuan room pathum ruak a awm tîr a, a mal mal chuan a fapate chu a chantîr a, tichuan a fate hnênah chuan, “In room chan ṭheuh hi in duh duhin tikhat vek ula, a tikhat ṭha ber chu he chhinna-ah hian pakhatna a ni ang a, ka sumdâwnna a nei ang,” a ti a.

A hmasa ber chuan motor lianin thil tam tak a phur khâwm a, a dah lût ta ruih ruih mai a. A pahnihna chuan thingkung lian tak tak a kit a, a zâr te nên chuan room khat tlat chuan a rem bawk a. A pathumna ve thung chuan room lai takah mawmbati lian tak pakhat a chhi a, a duhtâwk ta mai a.

An pa chuan a rawn en diat diat a, a hmasa ber tih dân te, a dawttu tih dân te chu ṭha a ti a, mahse a pathumna chuan mawmbati chiah a lo chhi si a, a pa chuan, “Tih khahna tûr engmah i nei ve na nge?” tiin a zâwt a. A fapa chuan, “Nei e, ka pa, han hawi vêl la, he mawmbati lian tak êngin room a luahkhah loh lai i hmu em?” a ti a. A pa chuan a han ngaihtuah a, a fapa thluak chu ṭha a ti êm êm a, a sumdâwnna chu a kutah a pe ta a ni.

Aw le, kan nun hi Isua ênnain a luahkhat ve em? Nge khawvêl thil dangten hmun an luah tam zâwk? Lal Isua thu leh hlaten hmun tam zâwk an luah nge a hming chauhin kan awmtîr ve le?

Ephesi 1:23
Kohhran chu a taksa a ni, engkim engkima tikhattu famkimna chu.