KOHHRAN PATHIAN KHAWPUI

SAM 87:1-3
A lungphûm chu tlâng thianghlimahte chuan a awm. Lalpa chuan Zion kulh kawngkhârte chu Jakob-ho awmna zawng zawng aiin a ngaina zâwk a ni. Aw Pathian khawpui, I chungchâng thu ropui takin an sawi ṭhîn a ni.

Israel fate chuan an khawpui Jerusalem chu an ngai hlu êm êm a. Jerusalem-ah chauh lo chuan Pathian biak theih ni pawhin an hre lo hial a. Babulon sala an tân chhûng zawng pawh khân an ngaihtuahna chu Jerusalem-ah a awm a. Jerusalem an theihnghilh ai chuan an kut ding lamin a thil thiam theihnghilh zâwk sela, an hriatreng loh chuan an lei pawh an dangah bet zâwk hial se an duh a ni (Sam 137).

Thuthlung Tharah chuan kohhran hi Pathian khawpui a ni a. A khua leh tuite chu Lal Isua thisena silfaite kan ni. Kohhran hi kan thlarau lam mamawh zawng zawng kan lâkna hmun a ni a. Chuvangin, a chhûngah kan chêng tûr a ni a, kan ngaisângin kan thlahlel ve ngawih ngawih tûr a ni.