IN RO AWMNA APIANGAH

LUKA 12:33-34
In neih apiang hralh ula, mi retheite hnênah pe rawh u; vânah rûkru kal lohnaah, sûlrûl ei chhiat lohnaah chuan tangka ip hlui thei lo te, sum ral thei lo te insiam rawh u. In ro awmna apiangah in rilru pawh a awm dâwn si a.

Thil kan ngaih pawimawh dânin kan sum hman dân a hril khawp mai. Kan rilru LALPA lamah hawi ila, khawvêl intlânsiaknaah hian awm dân tâwk kan thiam dâwn a ni. Lalpa’n ama ram leh a felna zawng hmasatu, vâna ro khâwl khâwmtute chu an mamawh ang zêlin a pêk belhchhah dâwn a ni.

Kan theihna te he khawvêl thil hmuh theih ral leh mai tûrah hian hmang zo lo tûrin min duh. Duhâmna kan pianpui a, hei hi krawsa kan khenbeh a ngai, milem biakna a ni si.

Ringtute u, khawnge ro in khâwl khâwm dâwn?
Thlarau bova i khâwl khâwm chu i hum ang;
Rinnaa i pêk tûr chu Lalpan a nghâk reng a ni,
“Eng zâtah nge min rin ngam dâwn le?”

LALPA, nangma lama rilru dah tlat fo thei tûrin min pui ang che.