UI CHUNGA PE LOVIN

2 KORINTH 9:7
Mi tinin ui chunga pe lovin, pêk loh theih loh anga ngaia pe hek lovin, an thinlunga an tum ang zêlin pe ṭheuh rawh se.

Lalpa’n pêk ṭul tia kan thinlunga a dah tawh kan pêk nghal mai loh avânga theihnghilh emaw zuzi leh hi a awl khawp mai. Pêkna thinlung nei tûrin min duh a, uikawm hi Pathian lawm zawng a ni lovin a rah pawh a ṭha thei lo.

Kum hlun tûr kan ni lo tih hre reng ila. khawvêlah engmah kan luhpui lo va, engmah kan chhuahpui dâwn bawk lo tih hi hrechiang ila chu thilpêk a awlsam sawt tûr. LALPA hnêna thil kan pêkin lâwm takin pêk zêl i tum ang u (Tirh 20:35).

Khawvêl sum tinreng leh lunghlu,
Ka dîl lo, nawmsakna nên;
Rilru mawi leh thianghlimna chu,
Ka dîl zâwk, chûng zawng ai chuan.

LALPA, ui lova pe tûrin min pui rawh.