KAL CHHUAH

MATTHAIA 28:19
Chutichuan, kal ula, hnam tina mi zirtîrahte siam ula, Pa leh Fapa leh Thlarau Thianghlim hmingah chuan baptis ula.

Kan Bible pum pui hi han en ila, Pathian thil tum leh duh dân tihlawhtling tûr chuan kal chhuah a ngai zêl tih theih a ni. Abrahama, Mosia, Isaia, Jeremia, Ezekiela, Jona, Zirtîrte leh Paula te ho pawh kha kal chhuaka Pathian Mission hna thawktute an ni.

Lal Isua pawh khawvêlah lo kalin mihring nihna zawng zawng min rawn ṭawmpui a, chu chuan a hmangaihna ropuizia min hriat chiantîr a ni. Kan Zosâpte pawh mahni in leh ramte kalsanin Mizoramah an lo kal a, kan nun dân leh ṭawngte zirin hmasawnna rahbi sâng takah min hlângkai a. Mizo Missionary-te pawh chutiang chuan an rawngbâwlsakte tân malsawmna an ni ṭhin. Kal chhuak chuan kalsan a nei ngei ngei ṭhin a, chu chuan chân leh tawrh pawh a keng tel ṭhin. Kal chhuak ve thei lo tân chuan awmhmuna thilpêk leh ṭawngṭaia lo ṭan ve pawh a ṭha a. Kohna dawng chu a kal chhuak ngei tûr a ni.