PÂWNGSUAL

ṬAH HLA 5:11-12
Zion-ah hmeichhiate chu an pâwngsual a, nulate chu Juda khawpuiahte. Lal fate an kutin an khai a, upate hmêl an zah lo.

Pâwngsual tih hi ’tisa châkna puitlin tûra mi duh lo chung tharuma beih’ kan ti thei âwm e. Pâwngsual kan hriat tam ber chu mipain hmeichhe chunga mawi lo taka a chêtna a ni a. Hun lo kal zêlah neih inangte chungah pawh a thleng ta zêl mai chu a nih hi!

Ṭah hlaa kan chhiar tâk bâkah khian Davida fapa Amraman a farnu Tamari a pâwngsual thu kan hmu a. Sodom khuaa miten Lota mikhual (vântirhkohte) pâwngsual tuma an beih dân kan hmu bawk. Hetiang khawvêla kan chên ve tâk mêk avâng hian khawlaiah naupang vahtir mai mai hi a him lo êm êm a ni. Naupan laia tawhsual tawh hian a hmeichhia a mipain kumkhaw chawr lohna a thlen thei a. Mahni nun leh mahni chhûngte nun fimkhurpui a pawimawh hle a ni. Pâwngsualtu nih hi kumkhuaa hmingchhiatna tling leh Pathian leh mahni mihringpuite huat hlawhna a nih avângin chîn rêng rêng loh tûr a ni.