LAL ISUA SCHOOL

MATTHAIA 11:28-30
“Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi; tichuan, in thlarau tân chawlhna in hmu ang. Ka nghâwngkawl chu a nuam a, ka phur pawh a zâng a ni,” a ti a.

Kan ramah hian school a tam ta hle a. Kohhran school leh eizawnna school pawh chhiar tham fe kan nei ta. Khawi school-ah pawh zirlai thiam thei lo ai chuan thiam thei deuh an tlângtla zêl a. Naupang result ṭha nei lo nu leh pa tân chuan admission chungchângah zahna tûr pawh a tam thei hle ṭhin.

Lal Isua chuan a school-ah admit duh leh duh loh a nei ve lo va. Seat full a awm ve lo va, session ṭan tirh leh tâwp lam pawh a awm chuang lo. Thil mak ang reng tak chu he school-ah hi chuan thiam leh tiṭha nia inhriate an hlawhchham a, thiam lo leh tling lo nia inhriate an hlawhtling thung ṭhin a. Lungkham nei lote aiin lungkham leh phurrit neite division a ṭha mah zel nia! He school zirtîrtu hi mi thuhnuairawlh leh inngaitlâwm tak a nih avângin a lût duhte chuan chu nun chu an neih ve a ngai ṭhin. He school-ah hian i lût ve tawh em? I luh tawh chuan i nunin i lo advertise dâwn nia!