TISA LEH THISEN AN NI SI LO

EPHESI 6:12
Kan buante hi tisa leh thisen an ni si lo, lalnate leh, thuneihnate leh, he thim chunga khawvêl rorêltute leh, vân hmunahte thlarau sualho awmte an ni zâwk e.

Zirlai pakhatin khawvêl leh mihring hi Pathian siam a nih a ring a. Zirtîrtu leh a zirlaipuite chuan an ring ve hauh lo. Zirtîrtu chuan a hmuh loh Pathian chu a rin chhan a zâwt a. A chhânnan a zirlaipuite zawhna a zâwt a, “Kan zirtîrtu lu hi in hmu em? A bân in hmu em? A ke in hmu em?” a ti zêl a, ‘Aw’ an ti dual dual zêl a. “A rîlphîr in hmu em?” a ti leh a, ‘Hmu lo’ an ti a. Zirlai pakhat chu a lo ding a, “A taksa zai ila, kan hmu thei ang,” a ti a. Zawhna dang: “Kan zirtîrtu rilru in hmu em?”, ‘Hmu lo,’ an ti rual dual a. “A taksa kan zai ang a, kan hmu thei ang em?” a ti a, ‘Hmu thei lo ang,’ an ti a. “A nih chuan kan zirtîrtu hian rilru rêng a lo nei lo a ni maw?” tiin a ṭhutna lam a pan ta a. Zirtîrtu chu inngaihtuah harhin Pathian awm ringin a piangthar ta nghe nghe a ni.

Suala min hruai ṭhin hi thil hmuh theih mai ni lovin hmuh theih loh, kan hmêlma, kan dote an ni. Pathian râlthuam famkima kan inthuama Krista chaknaa hneh chi an ni. Thlaphân lutuka, chak loh inrin ngawt tûr a ni lo. Min puitu hi a chak zâwk a ni tih hriain i zâm u.

LALPA hnênah chakna la zêl rawh.