MAHNI HMASIALNA ṬHA

SAM 37:3
Lalpa chu ring la, thil ṭha ti rawh; He ramah hian awm la, rinawmna ûm zêl rawh.

Mi pakhat hausa tak hian a ṭhian mistiri rethei tak hnênah chuan dollar 3,00,000 a pe a, “In min saksak la, i hlawh tûr ṭha tak ka siamsak ang che. Ka ring tâwk che a, a ṭha thei ang berin min saksak dâwn nia,” a ti a. Mistiri chuan a tam thei ang ber hlêp tumin hmanraw chhe ber chi hlîr a hmang a, nalh takin a thup a. Dollar 40,000 lai hlêpin a sa zo ta a.

Pâwn lama a lan dân chuan a mawi hle a, a neitupa pawh chu a lâwm hle a. In chhûng a luh pah chuan, “Kei chuan in ka nei tawh a, nangin i la nei ve si lo va, i in sak ngei hi ka pe ang che,” a ti ta mai a. Mistiri chuan ama in tûr a sa tih hre lova hmanraw chhia thupa a sa chu a inchhîr hlê mai a. Rei vak lo hnuah chuan a hmanraw chhe hman chu a lo lang ṭan a, a thawm zeuh zeuhva, a tâwpah chuan a hlêp aia tam mah a sêng ta a ni. Mi tin hian mahni in tûr kan sa ṭheuhva, kan sak chhiat hian tûman an tuar lo, mahni bawk a tuartu chu kan ni ṭhin. Mahni hmasialna ṭha chu rinawmna hi a ni a, rinawm lohna erawh chu mahni hrawk ngei pawh tihdâwnna a ni.