PA PAWIMAWHNA

JOSUA 24:15
Tin, Lalpa rawng bâwl hi ṭha lo âwm anga in hriat chuan, vawiinah hian tu rawng nge in bâwl dâwn thlang mai rawh u … Kei leh ka chhûngte erawh hi zawngin Lalpa rawng a ni kan bâwl dâwn ni,” a ti a.

Kan Bible hian pa dinhmun a dah pawimawh hle a, hmeichhia aia siam hmasak a nih zâwk vâng pawh a ni mai thei. Khawvêla hnam tam berte zînga thlahtu chhuinaah pawh mipa hming târ lan a ni deuh zêl a, hnam thuah pawh pa hnam zêl fate chhawmtîr a ni ṭhin. Pa chu thlahtu bul leh chhûngkaw phuar khâwmtu a ni a. Sakhaw thuah pawh puithiam hnathawktu tûr, puithiam aiawha ding a ni.

Pa chu nupui fanaute tân pawh innghahna tling leh râwn tlâk nih a pawimawh a. Mi dang thawh chhuah saa innghat mai lovin intodelh tumna rilru a pu tlat tûr a ni. Paho zîngah nupuite thawh chhuah sa ringa awm âwl mai mai hriat tûr pawh an awm fur mai. Chhûng inkhâwm pawh hruai thei lo pa leh Biak In kawng zawh ngai lo pa chu nupui fanaute tân innghahna tlâk an ni duh lo khawp nia! Paho i inen fiah ang u le.