KAN PA VÂNA MI

MATTHAIA 6:9
Chutichuan, nangni chu hetiang hian ṭawngṭai rawh u: “Kan Pa, vâna mi…”

Lalpa ṭawngṭaina hi Matthaia ziaka a lan dân chuan mi vervêkten an tih dân anga an ṭawngṭai mai mai loh nâna Lal Isua hian ṭawngṭai dân zirtîr angin a lang a. Luka ziakah chuan Johanan a zirtîrte ṭawngṭai dân a zirtîr avânga zirtîr ve angin ziak a ni. ‘Kan Pa’ tia ṭan a ni hian Pathian chu mi zawng zawng tân rin tlâk a nihzia a tilang a. Naupang têin a pa chu mi pa aia huai zâwk, thiltithei zâwk leh chak zâwkah a ngai ṭhîn a, a bulah a thla a ngam êm êm ṭhîn.

Chutiang chuan Lalpa ṭawngṭaina kan sawia ‘Kan Pa’ kan tih hian Pathian hi pathian dang zawng zawng aia ropui zâwk, thiltithei zâwk, chak zâwk leh huai zâwk a ni tih kan puang chhuak a ni. Chutiang khawpa Pa ropui kan neih Pathian chu vânah a awm a, ‘vâna mi’ kan tih hian mihring aia chungnung zâwk, sâng zâwk, thil dang zawng zawng laka hrang leh thianghlim a nihzia te a târ lang nghâl. Hetiang khawpa ropui leh thiltithei Pa kan nei hi kan thlamuanpui em aw?