SUAL TÛRA THLÊMNAAH MIN HRUAI LÛT SUH

MATTHAIA 6:13
Sual tûra thlêmnaah min hruai lût suh la, Mi sual lakah chuan min chhandam zâwk ang che,’ tiin.

Helai kan chhiara kan rilrua zawhna lo lang hmasa ber ṭhin chu, ‘Pathianin thil tisual tûrin min thlêm ngai em ni?’ tih hi a ni a. Amaherawhchu, helai thuin sawi a tum ni a lang chu, ‘thlêmna kan tawh pawhin do zo tûrin min pui ang che’ tih niin a rinawm. Thlêmna hi ringtu tân chuan ‘fiahna’ a nihna lai a awm a. Miin a chunga thlêmna lo thleng a hneh chuan zawi zawiin a nun tihhausakin a lo awm ṭhin.

Ringtu tân thlêmna pumpelh ngawt theih a ni lo. Lal Isua pawh kha thlêmna tâwk tûra thlalêra ni 40 leh zan 40 awmtîr a ni zâwk (Mt. 4:1). Jakoba chuan, “Ka unaute u, in rinna fiahna chuan chhelna a siam tih hriain, thlêmna tinrêng in tawh hunin lâwmna hlîrah ngai rawh u,” (1:2,3) a ti a. Pathian mi hman langsâr tak takte hi thlêmna hautak tak tak lo paltlang tawhte an ni châwk. Lal Isuan khawvêl a ngam ang khân keini pawh ngam ve theihna pêk kan ni tawh a ni.