COVID-19 LEH MIZO KRISTIANTE

COVID-19 LEH MIZO KRISTIANTE

— Chhantea (Oriela patea)
East Lungdar

Hla phuahtu in…

Tûn hi ṭawngṭai hun chu a ni
Thlarau a ṭawngṭai hun chu
I ram leh kohhranin ṭawngṭai tûrin an ko che
Tho la, Lalpa hnenah ṭawngṭai rawh.

Ni e… keini Pathian nung ringtute hi tûn ang hun aia nasa a ṭawngṭaina hun kan hman tam hun tûr hi a awm dâwn chuang em ni? Ringtute tân chuan chunglam vênna leh humhimna, thlamuanna leh awmpuina bâk beisei tûr a awm dâwn em ni? He kan ram engkim a intodelh loah he natna hi lo lut vaih teh se… kan ram chan hi a chau teh ang chu… hawh u… kan ram tân… i ṭawngṭai mawlh mawlh ang u.

Mak êm êm chu maw… keini ringtu Pathian nung bia inti te hian he covid-19 lo hmachhawn tûr hian kan tisa lam a kan theih tâwk chu kan ti ve teh meuh mai. Mahse… kan thlarau nun lam pachhiatna tuaitharna lam leh he hrî avang hian a chhe ber lo tâwk dâwn ta ila eng nge ka thlarau dinhmun tûr tih lam hi kan ngaihtuah meuh pawhin a lang lo.

Kan tisa himna tûr leh puar leh fânna tûr chhêk khâwl leh ngaihtuahin kan buai a, he hri leng mêk chung a thuneitu Pathian nung kut a tlûk luh nachâng kan hre hman meuh ta lo chu a nih ber mai hi maw.

Nehemia chuan a ram chhiatna chu amah leh a pa chhûngte mawhah ngaiin… ‘kei leh ka pa chhûngte chu kan lo sual ta a’ a ti mai a. Keini erawh chuan kan ram sualna avânga hremna tûra lo ngai tâwk lah bo lo. Kei leh ka pa chhûngte ti ngam a… he ram leh hnam, Kohhran tâna Pathian hmaa ṭhingṭhi ngam ringtu kan nih hi a va han hun tehlul êm!

Khawvêl thiamna, theihna, finna sâng tak hian Pathian theihna a hneh theihlohzia leh Pathian Pathianna hi khawvêl hian a cho phâk lohzia chu he hri lo leng mêk hian a ti fiah hlê lo em ni??? Chuvangin hawh u… Jehosaphata’n Lalpa a au ang khân… kan ram hian Lalpa lam hi i hawi ngawt teh ang u, Pathian hian min chhâng êm êm ang.

2 CHRONICLES 7:14
Ka hming pu ka mite chuan inngaitlâwma an ṭawngṭaia, mi zawna, an awm dân sualte an hawisan chuan, vân aṭangin ka lo ngaithla ang a, an sualte ka ngaidam ang a, an ram chu ka tidam leh ang.

Hawh u… he hri lo leng mêk hi Pathian hremna kan sual man hmuhna ti a insawiṭhaih lovin… kan ram natna hi ka natna a ni tiin Pathian hmaah i kûn za ang u… Thil siamtu tân thil siam tih danglam hi a har si lo.

Kan ram mai ni lo, he khawvêl leh he hri avânga buai mêkte tân hian khawvêl mamawh Isua krista hi i au ve dâwn em? Nang Pathian nung ringtu… khawvêl mamawh Isua krista au rawh le.

SAM 46:1-3
Pathian chu kan inhumhimna leh kan chakna, mangan laia ṭanpui vartu hnai reng a ni. Chuvângin, leilung hi lo danglamin, tlângte hi tuifinriat chhûng daihah insawn mah sela, kan hlau lo vang; A tuite chu ri hum humin phûl bulh bulh mah sela, a fâwn nasat avângin tlângte hi nghîng dur dur mah sela, kan hlau chuang hek lo vang. (Selah)

Pathianin a thu malsâwm rawh se. Amen.

avatar
2 Comment threads
0 Thread replies
0 Followers
 
Most reacted comment
Hottest comment thread
2 Comment authors
LalthlamuanaLalsangpuia Ralte Recent comment authors
  Subscribe  
newest oldest most voted
Notify of
Lalsangpuia Ralte
Guest
Lalsangpuia Ralte

Ziak ṭha hle mai 👍🙏

Lalthlamuana
Guest
Lalthlamuana

A ni kan nunna /dam na a tan mahni ṭheuh in enfiah a Engkimtihei Pathian hma ah kan thinlung zawng2 rirul zawng2 a ṭawngṭai hun ani

Copyright © 2017-2020 Our Daily Bread Mizo.
Privacy Policy