ISUA LAM I EN ANG U

ISUA LAM I EN ANG U

— Chhantea (Oriela patea)
E. Lungdar

MATTHAIA 14:28-31
Tin, Peteran a chhâng a, “Lalpa, nang i nih chuan tui chunga i hnêna lo kal thu mi pe rawh,” a ti a. Tin, ani chuan, “Lo kal ta che,” a ti a. Petera chu lawng ata a chhuk a, Isua hnên lam panin tui chungah chuan kein a kal a. Nimahsela, thli tleh chu a hmuhin a hlau va, a pil dâwn ta mai a, “Lalpa, min chhandam rawh,” tiin a au ta a. Tin, Isuan a ban ta nghâl a, amah chu a chelh a, a hnênah, “Nang, rin tlêm, engah nge i rinhlelh le?” a ti a.

Khai le… tun a kan ram leh khawvêl dinhmun, kan hun tawn mêkah hian eng lam nge i en a kan en le? Social media titi chauh nge kan en a… tunlai boruak he khawvêlin hun lungchhiatthlâk tak a tawh vângin Isua lam i en zâwk le?

Kan Bible châng lo tarlan hi Isua tui chunga a kal thu a ni. Ni e… khatia Isua tui chunga a kal zirtîrten an hmuh khan amah Isua a ni tih an hriat khân Petera khan Isua hnênah tui chunga kal ve a dîl a nih kha. Isuan a remti a a kal ta a.

Helai thuah hian Petera hian en tûr tam tak a nei…
Tuifâwn te,
Thli tleh te,
Isua te.

Isua thu awih a tui chunga a kal khân Isua chauh en chunga a kal lai chuan a buai lo… nimahsela… thli tleh a hmuhin a buai ta. A chhan chu Isua chauh Isua lam chauh a en loh vâng a ni.

Tunah hian kan ram leh khawvêl pawhin hri râpthlâk tak a hmachhawn a. Isua chauh en lo a he hri leh he hri lêngin mihringte min nghawng nat zia leh min tihbuaina chauh kan en chuan he hri lêngah hian kan buai tulh tulh ang. Hawh u… he hun harsaah hian Lalpa/Isua lam chauh en tu nih i tum tlat ang u.

Amah, ani, ama hnênah chauh chuan taksa leh thlarau himna a awm si a. Chu chu kan en tûr chu a ni.

Krista ka lungpui leh ka inhumhimna
Mangan ni-a ka bikna hmun.

4 Comments

  1. K van hlawk pui tak

  2. nunkawng chaw

  3. Amen!
    A ropuiin a hlawk thlak hle mai.

  4. Ka tan ahlu viau mai

Leave a Reply

Your email address will not be published. Required fields are marked *

Copyright © 2017 - 2020 Our Daily Bread Mizo.
Privacy Policy | Powered by MIZOHOSTING.